Ўзбекистоннинг қатор ҳудудларида кучли ёғингарчилик оқибатида сел ҳодисалари кузатилмоқда

Самарқанд ва Қашқадарё вилоятларида бугун, 13 апрель куни кучли ёғингарчилик оқибатида сел ҳодисалари кузатилмоқда.

Жумладан, Самарқанд шаҳри кўчаларида йўллар, шунингдек, Қашқадарёнинг Китоб туманидаги қишлоқларда сел ҳодисалари кузатилмоқда. Бундан ташқари, Сурхондарё вилояти Бойсун тумани марказий ҳудудларида кучли жала ва дўл ёғаётгани айтилмоқда. 

Шу билан бирга, Тошкент—Қарши автомобиль йўлида ҳам сел ҳодисаси кузатилмоқда.

Аввалроқ “Ўзгидромет” 12—15 апрель кунлари баъзи жойларда кучли ёмғир ёғиши, шу боис 9 та вилоятда сел-сув тошқини хавфидан огоҳлантирган эди. 

“Тоғолди ва тоғли ҳудудларда истиқомат қилувчи фуқаролар, дам олувчилар ҳамда тоғли ҳудудларда ҳаракатланувчи ҳайдовчилардан эҳтиёткорлик чораларини кўришларини сўраймиз”, — дейилган эди хабарда.

Шунингдек, республика ҳудуди бўйича ёмғир сувлари тўпланиши эҳтимоли бор, бу эса ҳудудларни сув босишига олиб келиши мумкинлиги айтилган.