Шимолий Қозоғистон вилоятидаги Сергеевский сув омборининг сиғими 175 фоизни ташкил қилмоқда (ҳажми – 1213 миллион куб метр). Сув оқими тўғондан 390 сантиметр баланд. Бу ҳақда “Petropavlovsk.news” хабар берди.
Бу Сергеевский сув омбори ишга туширилгандан бери, яъни 1968 йилдан бери кузатилмаган ва тўғондаги сув оқими 338 сантиметр бўлган 2017 йилдаги тарихий максимал кўрсаткичдан 52 сантиметрга кўпдир.
“Сергеевский гидроэлектр мажмуасидан юқоридаги Ишим ирмоқларида сув кескин пасая бошлаган. Бу сув тошқини чўққисини билдиради. Энди Сергеевский сув омбори тўғонининг қуйи оқимидаги аҳоли пунктлари, шунингдек, йирик кўллар яқинидаги қишлоқлар учун хавфли давр бошланди: Катта Тарангул уйғонмоқда”, — дейилади хабарда.
Эслатиб ўтамиз, Қозоғистонда сув тошқини туфайли деярли 64 минг киши эвакуация қилинган. Мамлакатда сув тошқини билан боғлиқ вазият оғирлигича қолмоқда. 6 апрель куни президент Қосим-Жўмарт Тўқаев Қозоғистон халқига мурожаат қилган. Унинг сўзларига кўра, “ҳозирги вазият, эҳтимол, миқёси ва оқибатлари бўйича сўнгги 80 йилдан ортиқ вақт мобайнийда кузатилган энг катта офат”дир.
Сув тошқинлари сабабли мамлакатнинг ўнта вилоятида (Абай, Ақмўла, Ақтўбе, Атирау, Ғарбий Қозоғистон, Қарағанда, Қўстанай, Павлодар, Шимолий Қозоғистон ва Улитов вилоятлари) маҳаллий даражадаги фавқулодда ҳолат эълон қилинган. Туркия сув тошқинларининг олдини олишда Қозоғистонга ёрдам кўрсатишга тайёрлигини билдирган.
Изоҳ (0)