Қозоғистоннинг 10 та вилоятида сув тошқини туфайли фавқулодда ҳолат эълон қилинди. Massaget.kz мухбири Атирау вилоятининг Қулсари шаҳарчасида бўлиб, вазият ҳақида маълумот берди.
Қулсари — Атирау вилояти Жилёй туманининг маъмурий маркази. Ҳудуддаги энг йирик нефть ишлаб чиқариш марказларидан бири. Шаҳар Эмба дарёсидан 91 километр узоқликда жойлашган. Аҳолиси 66 минг кишини ташкил қилади. Шаҳарда вазият жуда оғир, 31 мингга яқин аҳоли шаҳардан бошқа вилоятларга кўчиб ўтган, 14 та эвакуация пунктидан тўрттасини сув босган.
“Барча уйларимиз сув остида қолди. Сув ҳали ҳам оқмоқда. Маҳаллий аҳолининг энергияси туфайли шаҳарнинг бир қисми сақланиб қолди. Сув даражаси янада юқори бўлиши мумкин эди. Улар бизга кўп ёрдам беришди, 5 кундан бери ишлашмоқда”, — дейди шаҳарлик Болат Толеуишов.
Маҳаллий расмийларга кўра, шаҳарнинг 33 фоизи сув остида, 33 фоизи эса хавфли зонада. 2860 та объект сув остида қолган.
Атирау вилояти темирйўл вокзалининг фавқулодда вазиятлар бўлими бошлиғи Жантўре Демешовнинг сўзларига кўра, ҳозирда сув сатҳи пасаймоқда. Баъзи жойларда у 20 сантиметрга, бошқаларида 40 сантиметрга етади.
“Шаҳарда қутқарув ишлари давом этмоқда. Бундан ташқари, 3 та ёнғинга қарши насос станцияси сувни чиқаришга жалб қилинган. Тўғонлар қуриш, қопларни қум билан тўлдириш ишлари олиб борилмоқда. Ҳозирда Қозоғистон Мудофаа вазирлиги ҳарбий бошқармасидан қўшимча куч ва техника сафарбар қилинмоқда”, — деди у.
Шаҳарнинг қолган қисмини сақлаб қолишда хавфсизлик кучлари катта ёрдам бермоқда. Қулсари яқинидаги қабрлар ҳам сув остида қолган.
Агар сув қуриб қолса, барча чиқиндилар ер юзасига кўтарилади ва натижада экологик ҳалокат бўлиши мумкин. Бошқарма вакиллари вилоятга республикадан Санитария-эпидемиология назорати бошқармаси мутахассислари келганини айтган.
Тошқин даври бошидан буён 72 мингдан ортиқ одам, жумладан, 17 мингдан ортиқ болалар эвакуация қилинган. 3702 та хусусий турар жой бинолари, 550 дан ортиқ ҳовлилар ва 1,8 мингдан ортиқ дала уйлари сув остида қолмоқда. Қутқарув ишларига жами 13,6 мингдан ортиқ киши, 1,3 минг техника ва 7 та самолёт жалб этилган. Қозоғистондаги йирик сув тошқинлари оқибатида 5,7 мингдан ортиқ турли қишлоқ хўжалиги жониворлари нобуд бўлган.
Маълумот ўрнида, Қирғизистон сув тошқинидан жабрланган Қозоғистонда 300 тонна гуманитар юк жўнатган. Тожикистон ва Туркия эса сув тошқини оқибатларини бартараф этишда ёрдам таклиф қилган.
Изоҳ (0)