Қозоғистондаги йирик сув тошқинлари оқибатида 5,7 мингдан ортиқ турли қишлоқ хўжалиги жониворлари нобуд бўлди. Бу ҳақда республика Қишлоқ хўжалиги вазирлиги расмий вакили Олжас Тлебалдин брифингда маълум қилди.
“Сув босган ҳудудлардан 60 минг бошдан ортиқ қишлоқ хўжалиги ҳайвонлари хавфсиз ҳудудларга кўчирилди. Чорвалар нобуд бўлишининг олдини олишнинг иложи бўлмади. Тезкор маълумотларга кўра, республиканинг етти вилоятида нобуд бўлган қишлоқ хўжалиги ҳайвонлари сони 5711 бошни ташкил этган”, — деди у.
Амалдор 1013 бош нобуд бўлган ҳайвонлар, жумладан, йирик ва майда қорамоллар, шунингдек, отларнинг жасади утилизация қилинганини айтди.
Март ойида бошланган сув тошқинлари туфайли Қозоғистоннинг ўнта вилоятида маҳаллий фавқулодда ҳолат эълон қилинган. Тошқин даври бошидан буён 72 мингдан ортиқ одам, жумладан, 17 мингдан ортиқ болалар эвакуация қилинган. 3702 та хусусий турар жой бинолари, 550 дан ортиқ ҳовлилар ва 1,8 мингдан ортиқ дала уйлари сув остида қолмоқда. Қутқарув ишларига жами 13,6 мингдан ортиқ киши, 1,3 минг техника ва 7 та самолёт жалб этилган.
Изоҳ (0)