Уй ва ўсимликлар чанглари, ҳайвонларининг териси, қазғоқ ва юнглари, ҳар хил дори-дармонлар ва бир қатор озиқ-овқатлар баъзи инсонларда аллергик хасталикларни келтириб чиқаради. Аллергенлар аксарият кишиларда тумов ёки мавсумий аллергик касаллик — поллиноз кўринишида намоён бўлади.
Поллиноз энг кенг тарқалган аллергия тури бўлиб, дунё аҳолисининг ҳар тўртинчиси ундан азият чекади. Аллергик реакция йилнинг турли ойларида гуллайдиган ўсимликлар чангидан келиб чиқади. Аллергияга мойил инсонлар ҳудудлар бўйлаб ҳаводаги гулчанглар миқдорини баҳолашга ёрдам берадиган махсус хизматлар, мобил иловалардан фойдаланиши мумкин.
Аллергия намоён бўлиши
Аксарият инсонларда аллергиянинг одатий аломатлари кузатилади: аксириш, йўтал, бурун оқиши, кўзлар қизариши ва ёшланиши кабилар барча учун таниш ҳолатдир. Ўз вақтида даволанмаслик беморда бронхиал астма хуружлари безовта қилишига олиб келади.
Бироқ аллергиянинг баъзи аломатлари одатий белгилардан фарқ қилиши мумкин. Бундай аломатлар кам учрагани туфайли беморлар уларни аллергия билан боғламайди.
Доимий чарчоқ
Организмда аллергия қўзғаган вақтда гистамин моддаси кўп миқдорда ишлаб чиқарилади. Гистамин концентрациясининг ошиб бориши чарчоқ ҳисси кучайишига олиб келади.
Уйқусизлик
Поллиноз касаллигида уйқу сифатининг бузилиши табиий ҳолат. Аллергик ринит билан оғриган беморлар орасида ўтказилган тадқиқотларга кўра, 4000 нафар одамдан атиги 3,6 фоизи уйқу билан боғлиқ муаммолардан шикоят билдирмаган.
Меваларга аллергия қўзғалиши
Мавсумий аллергияга чалинган беморларда баъзи озиқ-овқатларга (олма, шафтоли ва ёнғоқлар) ҳам тўсатдан аллергия пайдо бўлади. Бундай ҳолат ўзаро аллергия деб аталади.
Бошда оғирлик ҳисси
Диққатни жамлай олмаслик, кундалик ишларни ҳал қилишда қийинчиликлар, хотира билан боғлиқ муаммолар ҳам поллиноз аломатларидан бири бўлиши мумкин. Бундай ҳолат организмдаги яллиғланиш жараёни туфайли юзага келиб, иммун тизими аллергенларни енгишга уринаётганидан дарак беради.
Қулоқ битиши
Мавсумий аллергиянинг белгиларидан бири бу қулоқларнинг битиши, шиш, қичишиш ва ҳатто қулоқдаги оғриқлардир.
Бош оғриғи
Пешона ва бурун соҳасидаги оғриқлар ҳам поллиноз билан боғлиқ бўлиши мумкин. Бош оғриғи узоқ вақт давомида бурун битиши ва унда суюқлик тўпланиши сабабли юзага келади.
Иммунологлар кучли аллергия қўзғаганда уйдаги деразаларни ёпиб юриш, ҳимоя кўзойнаклари ва респиратор ниқоб тақиш, ташқаридан уйга кирганда дарҳол кийимларни алмаштириш ва ювиниш, чойшабларни тез-тез алмаштиришни тавсия беради.
Изоҳ (0)