Uy va o‘simliklar changlari, hayvonlarining terisi, qazg‘oq va yunglari, har xil dori-darmonlar va bir qator oziq-ovqatlar ba’zi insonlarda allergik xastaliklarni keltirib chiqaradi. Allergenlar aksariyat kishilarda tumov yoki mavsumiy allergik kasallik — pollinoz ko‘rinishida namoyon bo‘ladi.
Pollinoz eng keng tarqalgan allergiya turi bo‘lib, dunyo aholisining har to‘rtinchisi undan aziyat chekadi. Allergik reaksiya yilning turli oylarida gullaydigan o‘simliklar changidan kelib chiqadi. Allergiyaga moyil insonlar hududlar bo‘ylab havodagi gulchanglar miqdorini baholashga yordam beradigan maxsus xizmatlar, mobil ilovalardan foydalanishi mumkin.
Allergiya namoyon bo‘lishi
Aksariyat insonlarda allergiyaning odatiy alomatlari kuzatiladi: aksirish, yo‘tal, burun oqishi, ko‘zlar qizarishi va yoshlanishi kabilar barcha uchun tanish holatdir. O‘z vaqtida davolanmaslik bemorda bronxial astma xurujlari bezovta qilishiga olib keladi.
Biroq allergiyaning ba’zi alomatlari odatiy belgilardan farq qilishi mumkin. Bunday alomatlar kam uchragani tufayli bemorlar ularni allergiya bilan bog‘lamaydi.
Doimiy charchoq
Organizmda allergiya qo‘zg‘agan vaqtda gistamin moddasi ko‘p miqdorda ishlab chiqariladi. Gistamin konsentratsiyasining oshib borishi charchoq hissi kuchayishiga olib keladi.
Uyqusizlik
Pollinoz kasalligida uyqu sifatining buzilishi tabiiy holat. Allergik rinit bilan og‘rigan bemorlar orasida o‘tkazilgan tadqiqotlarga ko‘ra, 4000 nafar odamdan atigi 3,6 foizi uyqu bilan bog‘liq muammolardan shikoyat bildirmagan.
Mevalarga allergiya qo‘zg‘alishi
Mavsumiy allergiyaga chalingan bemorlarda ba’zi oziq-ovqatlarga (olma, shaftoli va yong‘oqlar) ham to‘satdan allergiya paydo bo‘ladi. Bunday holat o‘zaro allergiya deb ataladi.
Boshda og‘irlik hissi
Diqqatni jamlay olmaslik, kundalik ishlarni hal qilishda qiyinchiliklar, xotira bilan bog‘liq muammolar ham pollinoz alomatlaridan biri bo‘lishi mumkin. Bunday holat organizmdagi yallig‘lanish jarayoni tufayli yuzaga kelib, immun tizimi allergenlarni yengishga urinayotganidan darak beradi.
Quloq bitishi
Mavsumiy allergiyaning belgilaridan biri bu quloqlarning bitishi, shish, qichishish va hatto quloqdagi og‘riqlardir.
Bosh og‘rig‘i
Peshona va burun sohasidagi og‘riqlar ham pollinoz bilan bog‘liq bo‘lishi mumkin. Bosh og‘rig‘i uzoq vaqt davomida burun bitishi va unda suyuqlik to‘planishi sababli yuzaga keladi.
Immunologlar kuchli allergiya qo‘zg‘aganda uydagi derazalarni yopib yurish, himoya ko‘zoynaklari va respirator niqob taqish, tashqaridan uyga kirganda darhol kiyimlarni almashtirish va yuvinish, choyshablarni tez-tez almashtirishni tavsiya beradi.
Izoh (0)