Сизда шу пайтга қадар аллергия кузатилмаган бўлса-да, деярли ҳамма ердаги кўплаб оддий нарсалар жуда хавфли бўлиши мумкин. Организм иммунитет реакциясининг кучайиши (ва бу аллергия) ҳар қандай ёшда ва исталган жойда учраши эҳтимолдан ҳоли эмас. Уйдаги нарса-буюмларнинг қайсилари аллергия хуружини қўзғатувчи эканини билиб олинг.

Гиламлар

Уйдаги чанг энг кучли аллергенлардан биридир. Аниқроғи, чангнинг ўзи иммунитет реакциясини келтириб чиқармайди, балки гиламда йиғиладиган чанг каналари касалликка сабаб бўлади. Гиламлар эса уларнинг севимли яшаш жойларидан биридир. Аллергия ривожланиш эҳтимолини камайтириш учун гиламларингизни вақти-вақти билан ўзингиз, махсус тозалагичлар, айниқса, кучли чангюткичлар билан ёки тозалаш компанияси ёрдамида чуқур тозалаб туринг.

Хонаки ўсимликлар

Биринчидан, баъзи гулларнинг ўзи аллерген бўлиши мумкин. Гул чанги ва барглари, ўсимликнинг кўзга кўринмайдиган майда зарралари ҳам аллергия қўзғатади. Иккинчидан, гул тувакларда, тупроқ юзасида ва сўлиб қолган барг ёки пояларда кучли аллерген — моғор пайдо бўлади. Биринчи навбатда ўсимлик ҳақидаги маълумотларни диққат билан ўрганишни ва потенсиал аллергенларни сотиб олмасликни маслаҳат берамиз. Шунингдек, қуриб қолган гуллар, барг ва пояларни ўз вақтида кесиб, тупроқ ва гул тувакни тоза сақланг.

Кондиционер

Аллергия билан оғриган одамларга уйларига кондиционер ўрнатиш тавсия этилади, чунки бу қурилмалар хонада нафақат қулай ҳароратни сақлашга, балки ҳавони филтрлашга, уни чанг зарралари ва аллергенлардан тозалашга ёрдам беради. Аммо вақт ўтиши билан кондиционернинг ўзи аллергенларнинг катта омборига айланади, уларнинг зарралари қурилма филтрларига жойлашади ва хонага қайта “пуфланади”. Йилига камида бир марта кондиционер филтрларини тозалаш муҳим, бу унинг узоқроқ ишлашига имкон берибгина қолмай соғлиғингизни ҳам ҳимоя қилади.

Юмшоқ ўйинчоқлар

Уларни баъзан “чанг йиғувчилар” деб аташади. Қолаверса, чанг каналари юмшоқ ўйинчоқларни ниҳоятда яхши кўради ва кўпинча улар ўйинчоқни битта улкан аллергенга айлантирадилар. Ушбу бомбани “зарарсизлантириш” учун ўйинчоқларни йилига камида икки марта ювиш керак.

Китоблар

Кутубхона, китоблардаги чанг маиший чангдан ҳам зарарлидир: биринчидан, каналар, иккинчидан, кучли аллерген бўлган босма сиёҳ ва елим зарралари туфайли хавф омили ортади. Китоб жавонларингизни камида ойига бир марта чангюткич билан тозалашни унутманг!

Чойшаб ва матраслар

Уйимиздаги энг кир тез тўпланадиган жойлардан бири — бу ётоқхонадир. Иссиқ ва нам муҳит бактерия ва микробларнинг ривожланиши учун идеал, матрас ва адёл эса чанг каналари тўпланадиган ҳақиқий шоҳона муҳитдир. Хавфни камайтириш учун биринчи навбатда чойшабни ҳар куни силкитиб, тўшакка ётишдан тайёрлашдан олдин уни шамоллатиб юборинг. Иккинчидан, чойшабингизни тез-тез ўзгартиринг, кўрпа ва адёлингизни мунтазам равишда кимёвий тозалаш ва вақти-вақти билан матрасни обдан тозалашни амалга ошириб туринг.

Ювиниш хонасининг парда ва гиламчаси

Ҳаммомдаги микро иқлим ҳар доим хонадоннинг қолган қисмига қараганда иссиқроқ ва намроқ бўлади. Шунинг учун бу жойда моғор тез-тез пайдо бўлади. Моғор жуда оз миқдорда, кўзга кўринмас бўлса ҳам у кучли аллергияга олиб келиши мумкин. Шу сабабли душ пардалари, гиламчалар ва сув тўпланадиган бошқа кичик нарсаларни ўзгартириб туриш лозим. Девор, шифт ва карнизлар — махсус антибактериал воситалар билан мунтазам тозаланиши керак.