Саудия Арабистонининг QSS AI & Robots компанияси Сара исмли ўзининг илк аёл қиёфасидаги робот-гуманоидини намойиш қилди. “Правила жизни” нашри таъкидлашича, у нафақат Арабистондаги, балки бутун Яқин Шарқдаги биринчи аёл робот-гуманоиддир.
Сара ташқи кўриниши 25 ёшли қизга ўхшайди. Унинг бўйи 1,62 метр бўлиб, миллий либос — абая кийиб юради. Робот яратувчиларнинг сўзларига кўра, гуманоидни имкон қадар нафис ва иболи тасвирлашга ҳаракат қилинган. Шунинг учун Сара сиёсат ёки шахсий мавзуларда гапирмайди, бундай саволларга жавоб бермайди ва суҳбат мавзусини ўзгартириб, одобсиз мавзулардан қочишга уринади.
Ар-Риёдддаги QSS AI & Robots бош директори Эли Метри:
“Биз Саудия Арабистониданмиз. Мамлакатимизда бундай мавзулар оммавий муҳокама қилинмаслиги керак”, — деб таъкидлади.
Гуманоид араб ва инглиз тилларида сўзлашади, унинг нутқи маҳаллий дастурчилар томонидан ишлаб чиқилган. Саудия Арабистони дастурчилари Сарани яратишда машҳур нейротармоқларга, жумладан, ChatGPT’га ишонч билдирмаган.
Сара тўлиқ равишда Саудия Арабистонида лойиҳаланган ва яратилган бўлиб, унинг ёрдамида мамлакат робототехника ва сунъий интеллект соҳасидаги муваффақиятларига жаҳон эътиборини қаратмоқчи.
Аввалроқ QSS AI & Robots Муҳаммад исмли яна бир робот-гуманоидни тақдим этган эди. Кўргазмада робот қўли билан мухбир аёлнинг елкасига тегиб кетгани учун турли мунозараларга сабаб бўлган эди.
Изоҳ (0)