Тошкент шаҳри Бектемир туманида фуқароларга қалбаки пулларни ўтказиб келган икки йигит ушланган. Бу ҳақда шаҳар ИИББ ахборот хизмати хабар берди.
Қайд этилишича, Бектемир туманида А. исмли йигит телефонини сотмоқчи бўлганида унга икки йигит харидор бўлади. Йигитлар телефонни фуқаро А.дан 300 долларга сотиб олган ва унга пулларни бериб кетган. Бироқ кўп ўтмасдан пуллар қалбаки экани маълум бўлган.
Фуқаро А. дарҳол ИИБга мурожаат қилган. ИИБ ходимларининг тезкор суриштирувлари натижасида қалбаки долларларни бериб кетган 34 ва 26 ёшли йигитлар ушланган.
Дастлабки суриштирувда икки йигит ўзаро тил бириктириб, танишидан олган сохта 1,6 минг доллар билан фуқароларни алдаб келаётгани аниқланган.
Қайд этилишича, ҳолат юзасидан Бектемир тумани ИИБ томонидан Жиноят кодексининг 176-моддаси (қалбаки пул, акциз маркаси ёки қимматли қоғозлар ясаш, уларни ўтказиш) 2-қисми “в” банди билан жиноят иши қўзғатилган. Икки йигитга нисбатан қамоққа олиш эҳтиёт чораси қўлланган. Ҳозирда тергов ҳаракатлари олиб борилмоқда.
Бундан олдин Навоий вилояти ИИБ ТҚХ Жиноят қидирув бўлими, ДХХ Навоий вилояти бошқармаси ва департамент ходимлари билан ҳамкорликда ўтказилган тезкор тадбирда жиноий гуруҳ томонидан 400 миллион сўм сохта пуллар 160 миллион сўм ҳақиқий пулларга алмаштирилаётган пайтда қўлга олинганди. Апрель бошларида эса Тошкент шаҳри Янгиҳаёт туманида харидор қалбаки пулга iPhone сотиб олгани, Тошкент вилояти Ангрен шаҳрида қалбаки пуллар муомалага киритилишининг олди олингани тўғрисида хабар берилганди.
Изоҳ (0)