Тожикистоннинг Ваҳдат шаҳрида яшовчи тўққиз нафар фуқаро Crocus’даги теракт ижрочилари билан алоқаси борликда айбланиб, қўлга олинди. Бу ҳақда Тожикистон махсус хизматларидаги манбага таяниб, “РИА Новости” хабар берди.
“Ваҳдатнинг 9 нафар фуқароси 22 март куни Crocus City Hall’да теракт содир этган шахслар билан алоқада бўлгани учун қўлга олинди”, — дейди манба.
Ҳибсга олинганлар ИШИД билан алоқада бўлганликда ҳам гумон қилинмоқда. Тўққиз нафар фуқаро Россия хавфсизлик кучлари билан ҳамкорликда ушланган. 26 март куни россиялик терговчилар терактда айбланаётган тўрт кишининг оила аъзоларини сўроқ қилиш учун Тожикистонга етиб келганди. Сўроқ давомида тожикистонлик айбланувчи Фаридун Шамсиддиннинг уйи муҳрлангани маълум бўлган.
Crocus City Hall’даги теракт 22 март куни кечқурун содир бўлди. Бир неча қуролланган киши концерт зали биносига бостириб кириб, оломонни отиб ташлаган, кейин эса бинони ёқиб юборган. Теракт оқибатида 137 киши ҳалок бўлган, 182 киши жароҳатланган. Ҳужумни содир этишда Тожикистоннинг тўрт нафар фуқароси айбланган, улар айбига иқрор бўлган.
Изоҳ (0)