“Россия ўз ҳудудида теракт тайёрланаётганини камида бир ой олдин билган” — Кирилл Буданов

Украина Мудофаа вазирлиги Разведка бош бошқармаси бошлиғи, генерал-лейтенант Кирилл Будановнинг айтишича, Россия ўз ҳудудида террорчилик операцияси тайёрланаётганини олдиндан билган.

“2024 йил 15 февралда Россия терактга тайёргарлик ҳақида билар эди. Бу маълумотлар Суриядаги разведка бўлими орқали олинган. У ердан Москвага етиб келган. Россия теракт йўқ жойдан содир бўлди, деб эртак тўқимоқда”, — деди у Стратегик коммуникациялар бўйича учинчи халқаро форумда.

Будановнинг сўзларига кўра, Россия жангарилар гуруҳи қаердан келишини, қайси икки давлат орқали мамлакат  ҳудудига ўтишини билган.

“Нега улар бунга йўл қўйишди? Бир нечта вариант бор. Биринчиси, уларнинг одатига кўра, кланлар ўртасида кадрлар бўйича кураш. Терактдан сўнг бир нечта амалдорлар лавозимидан олиб ташланади. Бошқа вариант эса, улар ҳақиқатан ҳам терактнинг кўламини паст баҳолаган. Россия бу террорчилик ҳаракати кичикроқ кўламда бўлади, деб ўйлади ва ҳамма нарсада Украинани айбламоқчи бўлди”, — деди Буданов.

Унинг таъкидлашича, Кремль Crocus City Hall’да содир бўлган воқеалар версияларини аллақачон уч марта ўзгартириб, терактни Украина билан боғлашга уринган.

“Патрушев ва Бортниковнинг тушунтиришлари пайдо бўлди, улар мени шахсан айбладилар ва буларнинг барчасини Украина қилди, деб айтдилар. Бу бемаънилик. Айтганча, агар биз бу оғриқли масалага тўхталган бўлсак, гарчи бу душман бўлса ҳам, мен террорчиликни принципиал жиҳатдан маъқулламайман. Чунки бу тинч аҳолига қарши қаратилган ҳаракат”, — деди Буданов.