2,5 гектарга 45 минг доллар: Ўзбекистоннинг қатор ҳудудларида ерни ноқонуний сотмоқчи бўлганлар ушланди

Ўзбекистоннинг қатор ҳудудларида ерни ноқонуний сотмоқчи бўлганлар ушланди, деб хабар бермоқда Иқтисодий жиноятларга қарши курашиш департаменти.

Маълум қилинишича, Бош прокуратура ҳузуридаги Департаментнинг Қашқадарё вилоят бошқармаси томонидан ИИБ ходимлари билан ҳамкорликда ўтказилган тезкор тадбирда фуқаро Д.Е. фуқаро Д.С.нинг ишончига кириб, ҳокимият ва кадастр идораларида ишловчи танишлари ёрдамида Қарши тумани “Отчопар” МФЙ ҳудудида жойлашган бошқа бир фуқаро Б.Р.га иссиқхона қуриш учун ажратилган 2,5 гектар ер майдонини 45 000 АҚШ доллари эвазига унинг номига расмийлаштириб олиб беришини ваъда қилган. Ушбу пуллар ҳисобидан 63 миллион сўмни олган вақтида ашёвий далиллар билан ушланган.

Шунингдек, департамент ҳамда ДХХнинг Оқдарё тумани бўлимлари томонидан ўтказилган тезкор тадбирда фуқаро Ж.Ф. фуқаро А.Э.га гўёки юқори лавозимда ишловчи танишлари ёрдамида “Даҳбет” МФЙ ҳудудидан 30 000 АҚШ доллари эвазига 10 сотих ер майдонини расмийлаштириб олиб беришини ваъда қилиб, олдиндан 10 000 АҚШ долларини олган вақтида ашёвий далиллар билан ушланган.

Шу каби, Департаментнинг Қорақалпоғистон бошқармаси, ДХХ ва ИИВ ходимлари ҳамкорлигида ўтказилган тезкор тадбирда фуқаро Х.А. фуқаро Б.Т.га Нукус шаҳри “Ботаника боғи” МФЙ ҳудудидаги 4 сотих ер майдонини гўёки бошқа бир фуқаро Ш.Д.га ажратилгани тўғрисида сохта ҳужжатларни кўрсатиб, ушбу ер майдонини фуқаро Б.Т.га 160 миллион сўмга сотаётган вақтида ашёвий далиллар билан ушланган.

Департаментнинг Навоий вилоят бошқармаси томонидан ИИБ ходимлари билан ҳамкорликда ўтказилган тезкор тадбирда эса фуқаро А.Ғ. фуқаро Н.Ф.га Қизилтепа тумани “Ўзбекистон” МФЙ ҳудудидаги қурилиши тугалланмаган бино ва унинг атрофидаги туман захирасидаги 6 сотих ер майдонини гўёки ҳокимият ва кадастр идораларида ишловчи танишлари ёрдамида турар жой қуриш учун олиб бериши эвазига 10 000 АҚШ долларини олган вақтида ашёвий далиллар билан ушланган.

Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.