Актирса Кэмерон Диас ва унинг турмуш ўртоғи Бенжамин Мэдден мухлислари билан ажойиб янгиликни бўлишди. Harper’s Bazaar нашрининг хабар беришича, юлдузлар оиласида иккинчи фарзанд дунёга келди.
Беш ёшли Реддикс исмли қизининг тарбияси билан банд Кэмерон ва Бенжамин 23 март куни ўғил фарзандли бўлганини Instagram саҳифасида эълон қилди:
Биз ўғлимиз Кардинал Мэдденнинг дунёга келганини эълон қилишдан ғоят мамнунмиз! Фарзандимиз ҳаётининг хавфсизлигини таъминлаш мақсадида ҳеч қандай фотосуратини жойлаштирмаймиз. Айтиш жоизки, у жуда ҳам ёқимтой бола! Оиламиз номидан барчага чексиз муҳаббат ва эзгулик тилаймиз!, — деб ёзади Кэмерон.
Ижтимоий тармоқлардаги сўнгги расмларга кўра 51 ёшли актриса ҳомиладор бўлмаганини ҳисобга олсак, катта эҳтимол билан у суррогат оналикни танлаган, деб тахмин қилинмоқда.
Аввалроқ актриса журналистларга берган интервьюсида оналик унинг ҳаётини тубдан ўзгартиргани ва ҳақиқий бахт ҳиссини фарзандли бўлгач ҳис эта бошлагани ҳақида сўзлаб берган эди.
Қизиқарлиси, Кэмерон Голливуд оламида энг машҳур чайлдфри (фарзандли бўлишни истамайдиган) актрисалардан бири бўлган. Йиллар ўтиб у ўз фикрини ўзгартирди. Ҳозирда Диас режиссёрларнинг экранга қайтиш таклифини ҳеч қандай шубҳасиз рад этиб келмоқда.
Изоҳ (0)