Миллий рақамли экотизим ва агентлик ҳаво сифатини мониторинг қилиш бўйича лойиҳаларни биргаликда амалга оширишга келишиб олдилар.
Ўзбекистон Республикаси экология, атроф-муҳитни муҳофаза қилиш ва иқлим ўзгариши вазирлиги ҳузуридаги Гидрометеорология хизмати агентлиги директори Шерзодхўжа Ҳабибуллаев ҳамда Uzum Market маркетплейси бош директори Илшат Хаметов ҳамкорлик меморандумини имзолади.
Uzum билан ҳамкорлик орқали “Ўзгидромет” мамлакатдаги ҳаво сифатини назорат қилиш ва сақлаш бўйича лойиҳаларни амалга ошириш учун экотизим ресурсларидан фойдаланиш имкониятига эга бўлади.
— Биз бизнеснинг экологик ташаббусларини маъқуллаймиз ва қўллаб-қувватлаймиз. Ва, албатта, Uzum экотизимининг улкан инфратузилмаси агентлик лойиҳаларини амалга оширишда катта ёрдам бериши мумкин, — дейди Шерзодхўжа Ҳабибуллаев. — Биз ҳозир иккита асосий йўналиш бўйича иш бошладик: мониторинг тизимини ривожлантириш ва бутун мамлакат бўйлаб яшил майдонларни шакллантириш.
— Бизнинг умумий вазифамиз — бутун мамлакат бўйлаб одамларнинг ҳаёт сифатини оширишдир. Уларга энг замонавий технологиялар ва юз минглаб товарлардан фойдаланиш имкониятини бериш, инсон ва иқтисодий салоҳиятни, шу жумладан, экоголик муҳитни ривожлантириш ва амалга ошириш учун қулай муҳит яратиш, — деди Илшат Хаметов. — Жамоа билан биргаликда биз бутун мамлакат бўйлаб дарахтлар экдик, пластик пакетларимизни қайта ишлашни жорий қилдик ва ҳозиргача утилизация қилиш учун 40 минг тоннадан ортиқ пластик топширдик. Ва, албатта, бизнинг инфратузилмамиз ва ресурсларимизни энг муҳими — атроф-муҳитни тоза сақлаш учун тақдим этишга тайёрмиз.
Бугунги кунда лойиҳанинг биринчи босқичи амалга оширилди: Наврўз баҳор байрами арафасида Тошкентда ва Ўзбекистоннинг яна 20 шаҳрида 100 дан ортиқ дарахт экилди. Улар тўғрисидаги маълумотлар Экология вазирлигига “Яшил макон” миллий тизимига киритиш учун топширилди. Йил давомида бутун мамлакат бўйлаб Uzum Market миллий маркетплейси буюртмаларини тарқатиш пунктларида ҳаво сифати мониторинги датчиклари пайдо бўлади.
Шериклик ҳуқуқи асосида.
Изоҳ (0)