Россия президенти матбуот котиби Дмитрий Песков ўтган сайловларнинг “ноқонунийлиги” ҳақидаги муҳокамаларни абсурд деб атади. Кремль АҚШнинг Россиядаги сайловлар эркин бўлмагани ҳақидаги баёнотларига қўшилмайди ва Вашингтон позициясига қулоқ солиш ниятида эмас. Бу ҳақида Песков хабар қилди.
Кремль вакилининг таъкидлашича, Владимир Путин бир кун аввал АҚШ ва Ғарб давлатларининг бундай баҳоларини “кутилган муносабат” деб атаган. “Де-факто Америка Қўшма Штатлари Украинадаги урушга чуқур аралашган давлат эканлигини ҳисобга олсак, бу биз тинглашга тайёр бўлган фикр эмас”, — деди Песков матбуот мулоқоти чоғида.
Кремль вакили хориждаги Россия мухолифатининг сайловларни ноқонуний деб тан олиш ғояларига ҳам изоҳ берди. Айниқса, Юлия Навальная Ғарб ҳукуматларига шундай мурожаат қилди. Песковнинг таъкидлашича, мамлакатни тарк этганлар орасида кўпчилик “ватанидан бутунлай узилган”. Унинг фикрига кўра, Юлия Навальная “ўз илдизларини йўқотаётган одамлар тоифасига мансуб”.
“Мамлакатимиздаги сайловларнинг ноқонунийлиги ҳақида гапирадиган бўлсак, унда президент Путин учун берилган мамлакатимиз аҳолисининг 87 фоиз овозининг ноқонунийлиги ҳақида гапиришимиз керак бўлади. Бу абсурд. Биз бунга шундай ёндашамиз”, — дея қўшимча қилди Песков.
Изоҳ (0)