Навоийда маст ҳолатда транспорт воситасини бошқарган ҳайдовчи ЙПХ ходимига пора беришга уринди. Бу ҳақда “Ёшлар” телеканали орқали эфирга узатилган лавҳада маълум қилинди.
Қайд этилишича, Навоий шаҳрида хизмат олиб бораётган ЙПХ ходимлари Ибн Сино кўчаси бўйлаб ҳаракатланиб келаётган Nexia-2 русумли транспорт воситасини тўхтатган. Бунга автомобилнинг олд ўриндиғида ҳали 12 ёшга тўлмаган бола бўлган. Жараёнда ҳайдовчи ходимларда шубҳа уйғотган ва алкотестер орқали текширув давомида унинг спиртли ичимлик истеъмол қилгани маълум бўлган.
Ҳолат юзасидан Маъмурий жавобгарлик тўғрисидаги кодекснинг 131-модда (транспорт воситаларини маст ҳолда бошқариш) 1-қисми ва 128-модда (ҳайдовчиларнинг транспорт воситаларини пиёдалар йўлкаларидан юргизиши, йўл белгилари ва йўл ҳаракатининг бошқа қоидалари талабларига риоя этмаслиги) 1-қисми билан маъмурий баённомалар расмийлаштирилган. Ҳайдовчи мазкур баённомалар расмийлаштирилмаслиги учун ЙПХ ходимларига 3 миллион сўм пора таклиф қилган.
Ички ишлар вазирлиги Шахсий хавфсизлик бош бошқармаси Навоий вилоят бўлими ҳамда департаментнинг Навоий вилоят бошқармаси ходимлари ҳамкорлигида ўтказилган тезкор тадбирда гумонланувчи ходимга 3 миллион сўмни бераётганида қўлга олинган.
Коррупция ҳолати ҳақида тегишли ташкилот масъулларига хабар берган ходимларга ташаккурнома эълон қилиниб, ИИБ томонидан пул мукофоти билан рағбатлантирилди.
ЙПХ ходимларига пора бериш ҳолатлари
Бухорода маст ҳолда машина бошқарган ҳайдовчи ЙПХ инспекторига 100 доллар пора беришга урингани тўғрисида хабар берилганди. Шунингдек, Бойсун туманида ЙПХ инспекторига пора беришга уринган қоидабузар ҳайдовчига нисбатан жиноят иши қўзғатилган эди. Апрель ойида бўлса Сурхондарёда ЙПХ инспектори 800 доллар пора олаётганида қўлга тушганди.
Изоҳ (0)