Буюк Британия қироли Чарльз III Букингем саройи учун ошпаз лавозими вакансиясини эълон қилди. Унинг вазифаларига олий ҳазратлари ва меҳмонлар учун таом тайёрлаш, зиёфатлар ташкил этиш киради. Танлов ғолиби Букингем саройидаги ошпазлар жамоасига қўшилади, деб ёзади “Корреспондент.нет”.
Бўш иш ўрнига номзод шоҳона таом тайёрлаш билан бирга саёҳатларга ҳам шай туриши керак. Янги ошпаз биринчи навбатда қиролнинг Лондондаги асосий уйи — Букингем саройида ишлайди. Вақти-вақти билан у Шотландиядаги Balmoral ва Голируд саройи каби бошқа қароргоҳларга кўчиб ўтишга тайёр бўлиши керак.
Эълонга кўра, янги ходимга беш кунлик иш ҳафтаси, уй-жой ва яхши ойлик маош таклиф этилади. Шунингдек, ошпаз барча зарур озиқ-овқат билан таъминланади. Танлаб олинган номзод профессионал ҳамкасблари билан биргаликда юқори стандартларга мос турли хил таомлар тайёрлайдиган тажрибали ва аҳил жамоага қўшилади.
Хабарда айтилишича, ошпаз камида беш юлдузли премиум кейтеринг соҳасида катта тажрибага эга бўлиши, француз ошхонасидан хабардор бўлиши лозим.
Янги ошпаз билан доимий шартнома тузиб борилади. Лавозимга ариза топширишнинг охирги муддати — 1- апрель деб белгиланган.
Изоҳ (0)