Buyuk Britaniya qiroli Charlz III Bukingem saroyi uchun oshpaz lavozimi vakansiyasini e’lon qildi. Uning vazifalariga oliy hazratlari va mehmonlar uchun taom tayyorlash, ziyofatlar tashkil etish kiradi. Tanlov g‘olibi Bukingem saroyidagi oshpazlar jamoasiga qo‘shiladi, deb yozadi “Korrespondent.net”.
Bo‘sh ish o‘rniga nomzod shohona taom tayyorlash bilan birga sayohatlarga ham shay turishi kerak. Yangi oshpaz birinchi navbatda qirolning Londondagi asosiy uyi — Bukingem saroyida ishlaydi. Vaqti-vaqti bilan u Shotlandiyadagi Balmoral va Golirud saroyi kabi boshqa qarorgohlarga ko‘chib o‘tishga tayyor bo‘lishi kerak.
E’longa ko‘ra, yangi xodimga besh kunlik ish haftasi, uy-joy va yaxshi oylik maosh taklif etiladi. Shuningdek, oshpaz barcha zarur oziq-ovqat bilan ta’minlanadi. Tanlab olingan nomzod professional hamkasblari bilan birgalikda yuqori standartlarga mos turli xil taomlar tayyorlaydigan tajribali va ahil jamoaga qo‘shiladi.
Xabarda aytilishicha, oshpaz kamida besh yulduzli premium keytering sohasida katta tajribaga ega bo‘lishi, fransuz oshxonasidan xabardor bo‘lishi lozim.
Yangi oshpaz bilan doimiy shartnoma tuzib boriladi. Lavozimga ariza topshirishning oxirgi muddati — 1- aprel deb belgilangan.
Izoh (0)