Ўзбекистонда тадбиркорлар фаолиятини кенгайтириш ва экспортга жалб этиш борасидаги агентлик ва жамғармалар ўрнига Савдони ривожлантириш компанияси ташкил этилди.
14 март куни “Ташқи савдо ва ҳудудий саноатни ривожлантиришда тадбиркорлар бирлашмаларининг ролини янада ошириш чора-тадбирлари тўғрисида”ги президент қарори қабул қилинди.
Қарорга кўра, Экспортни рағбатлантириш агентлиги ҳамда Экспортни қўллаб-қувватлаш жамғармаси негизида Савдони ривожлантириш компанияси ташкил этилди ва унинг устав капиталидаги давлат улушини бошқариш функцияси ишончнома асосида Савдо-саноат палатасига берилди.
Ташқи иқтисодий фаолият иштирокчиларига кўмаклашиш (экспортолди ва экспорт билан боғлиқ савдо операцияларини молиялаштириш бундан мустасно) учун давлат бюджетидан ажратиладиган маблағларни Инвестициялар, саноат ва савдо вазирлигида юридик шахс ташкил этмасдан очиладиган Савдога кўмаклашиш жамғармасига йўналтириш ҳамда жамғарма маблағларини бошқариш ҳуқуқи компанияга берилди.
“Ўзбекекспертиза” устав капиталидаги давлат улуши ва айрим давлат иштирокидаги корхоналарга тегишли улушларни Давлат активларини бошқариш агентлигига ўтказган ҳолда давлат улушини бошқариш функциясини ишончнома асосида Савдо-саноат палатасига берилди.
Махсус иқтисодий, кичик саноат, ёшлар саноат ва тадбиркорлик зоналарига инвесторларни жалб қилиш, уларнинг иштирокчиларига кўмаклашиш Савдо-саноат палатасининг вазифаларидан бири сифатида белгиланди.
Савдони ривожлантириш компаниясининг фаолияти қуйидагиларга йўналтирилади:
- ташқи иқтисодий фаолият иштирокчиларини давлат томонидан молиявий қўллаб-қувватлаш чораларининг барқарорлик рейтинги асосида самарадорлиги ва натижадорлигини ошириш;
- давлат маблағларининг юқори қўшилган қийматли маҳсулот экспорт қиладиган ҳамда янги бозорларга чиқадиган корхоналарга етказилишини таъминлаш;
- транспорт логистикаси, сертификатлаш, стандартлаштириш ва сифат назорати, солиқ ва божхона маъмуриятчилиги ҳамда экспорт фаолияти бўйича ахборот ва маслаҳат бериш;
- миллий брендлар ва маҳсулотларни хорижда тарғиб қилишда Made in Uzbekistan дастурини амалга ошириш, миллий, тармоқ ва минтақавий кўргазмалар ҳамда товарлар ярмаркаларини ўтказишда иштирок этиш ҳамда молиялаштириш.
2024 йил 1 июлдан бошлаб компания томонидан қўллаб-қувватлаш чоралари Тадбиркорлик субъектларининг барқарорлик рейтинги асосида тақдим этилади.
Экспортни қўллаб-қувватлаш мақсадида давлат томонидан тақдим этилаётган субсидия ва преференциялар Тарифлар ва савдо бўйича бош битимга (GАТТ) ҳамда Субсидиялар ва компенсация чоралари тўғрисидаги битимга (АСCМ) мувофиқлаштирилади.
Савдо-саноат палатаси Экспортни рағбатлантириш агентлиги ҳузуридаги Тўқимачилик соҳасини қўллаб-қувватлаш жамғармасининг бошқарувини вақтинчалик амалга оширади.
Савдо-саноат палатасининг Қорақалпоғистон Республикаси, вилоятлар ва Тошкент шаҳрида Тадбиркорларни қўллаб-қувватлаш лойиҳа офислари ташкил этилади.
Савдони ривожлантириш компанияси ташкил этилиши ҳақида
Шавкат Мирзиёев 2024 йилнинг январида ўтказиган видеоселектор йиғилишида Жаҳон савдо ташкилоти талаблари асосида Экспорт агентлиги Савдони ривожлантириш компанияси сифатида қайта ташкил этилишини маълум қилганди. Президент Экспорт агентлиги экспортчиларга ҳақиқий кўмакчи бўлиш ўрнига давлатдан берилган тайёр пулни йўналтирадиган “бухгалтер-кассир”га айланиб қолганини танқид қилганди.
Давлат раҳбари 12 март куни тадбиркорлар фаолиятини кенгайтириш ва экспортга жалб этиш бўйича таклифлар тақдимоти билан танишганида ушбу компания ривожланган мамлакатлар тажрибасидан келиб чиқиб ташкил этилишини айтганди.
Изоҳ (0)