Ўзбекистонда бензин импорти савдоси билан шуғулланувчи тадбиркорлар соҳадаги 7 та муаммони айтиб ўтди. Бу ҳақда Рақобатни ривожлантириш ва истеъмолчилар ҳуқуқларини ҳимоя қилиш қўмитаси ахборот хизмати хабар берди.
Хабар берилишича, Рақобатни ривожлантириш ва истеъмолчилар ҳуқуқларини ҳимоя қилиш қўмитасида қўмита раҳбарияти бошчилигида республикада фаолият юритаётган бензин импорти савдоси билан шуғулланувчи хўжалик юритувчи субъектлар билан соҳадаги мавжуд тизимли муаммоларни аниқлаш ва импорт имкониятларни ошириш бўйича аниқ таклифларни ишлаб чиқишга бағишланган “очиқ мулоқот” ўтказилди.
Учрашувда соҳада мавжуд тизимли муаммоларни аниқлаш ва уларни бартараф этиш юзасидан таклифлар ишлаб чиқиш, хусусан, автомобиль бензини импортини ошириш масалалари муҳокама қилинди. Жумладан, тадбиркорлар қуйидаги муаммоларни айтиб ўтди:
- автомобиль бензини импорти билан шуғулланувчи тадбиркорлик субъектлари учун банклар томонидан ажратилган кредит юкламаси юқорилиги;
- логистика нархлари юқорилиги, Россиядан Келес чегарасигача бўлган масофа (1700 км)да бензиннинг бир тоннаси учун 150 доллар бўлган бир пайтда ички темирйўл орқали ташиш хизмати 8-10 км учун 15-20 долларни ташкил этиши;
- импорт қилинган ва Россия томонидан бензин маҳсулоти барча стандартларга тўғри келиши ва сифати талабга жавоб бериши юзасидан ҳужжатлар борлигига қарамай, республикага олиб кирганда қўшимча мажбурий сертификатлашдан ўтказиш;
- импорт қилинган бензин маҳсулоти учун ҚҚС тўловини тўлаш муддати қисқалиги;
- импорт қилиш ниятида хорижий давлатларга пул маблағларини ўтказиб берганда, ушбу маблағлар геосиёсий вазиятлардан келиб чиқиб тақиқларга тушиб қолган вақтларда маҳсулот ўз муддатида етиб келмаслиги кузатилган. Айни шу даврда маҳсулот реализация қилинмаган, бироқ маблағлар ўтказилганлиги учун солиққа тортилиши ҳолатлари;
- импортёрлар катта ҳажмларда бензин маҳсулотини олиб кирганда, уларни сақлаш учун сиғимлар мавжуд эмаслиги ҳамда мавжуд бўлган сиғимлар ижараси қимматлиги;
- импортёрлар Туркманистондан бензин маҳсулотини харид қилиш жараёни жуда кўп вақтни талаб қилиши, натижада айланма пул маблағлари музлаб қолиши.
Изоҳ (0)