Украина қуролли кучлари Россиянинг бешта вилоятига дронлар учирди. Бу ҳақда Deutsche Welle хабар берди.
Белгород, Брянск, Воронеж, Ленинград ва Курск вилояти губернаторлари ҳаво ҳужумидан мудофаа кучлари Украина дронларини уриб туширганини маълум қилган. Липецк вилояти раҳбари ҳам дрон ҳужумлари хавфи ҳақида огоҳлантирган.
Украинадан дронлар яқинлашмоқда. Барча куч ва воситалар максимал шай ҳолатга келтирилган, — деган Липецк вилояти губернатор Игор Артамонов.
Дрон қулаши натижасида қурбонлар ва жиддий вайронагарчиликлар ҳақида маълумотлар йўқ.
Бироқ Белгород вилоятида Шебекино шаҳрини ўққа тутиш чоғида саноат корхонасининг бир ходими яраланди, — дейди вилоят губернатори Вячеслав Гладков.
Ленинград вилояти губернатори Александр Дрозденко КINEF нефтни қайта ишлаш заводига яқинлашаётганда самолёт типидаги дрон уриб туширилганини маълум қилди.
Ишлаб чиқариш одатдагидек фаолият олиб бормоқда. Қурбонлар ва вайронагарчиликлар йўқ. Ҳодиса жойидаги оқибатлар аниқланиб, бартараф этилди, — дейди у.
Рязандаги нефтни қайта ишлаш заводига ҳам дрон ҳужум қилган, вилоят губернатори Павел Малков ҳужумни тасдиқлаган. Ҳужум натижасида ёнғин бошланган. Дастлабки маълумотларга кўра, жароҳатланганлар бор. Жумладан, икки киши ўртача оғирликдаги жароҳат билан касалхонага ётқизилган.
Маълумот ўрнида, 12 март куни ҳам Россияга дронлар ҳужум қилганда нефть базалари нишонга олинган. Бундан ташқари Украина томонда жанг қилаётган “Россияга озодлик” легиони ва “Сибир батальони” Россия чегарасини кесиб ўтиб, рус армияси билан тўқнашганини маълум қилган. Ҳолат юзасидан Россия Мудофаа вазирлиги баёнот бериб, уларнинг ҳужуми қайтарилганини таъкидлаган.
Шу куни Россияда Ил-76 ҳарбий самолёти двигателда содир бўлган ёнғин оқибатида қулаб тушган. Бортда 15 киши бўлган, экипаж аъзолари ҳалок бўлган.
Изоҳ (0)