“Тошкент қишлоқ хўжалик маҳсулотлари улгуржи бозори” АЖ фаолияти расман тугатилди. Бу ҳақдаги маълумот Истиқболли лойиҳалар миллий агентлиги корпоратив ахборот ягона порталида мавжуд.
2024 йили бошида бозор реконструкцияга ёпилгани ҳақида хабарлар тарқалган эди.
“Тошкент қишлоқ хўжалик маҳсулотлари улгуржи бозори” расмий сайтида 1 март куни берилган хабарга кўра, 2024 йил 29 февралдан жамият акциядорларининг қарорига кўра ихтиёрий тугатилмоқда.
Тугатилаётган “Тошкент қишлоқ хўжалик маҳсулотлари улгуржи бозори” бўйича мурожаатлар тугатиш тўғрисидаги эълон чиққан пайтдан эътиборан икки ой давомида Тошкент шаҳри, Бектемир тумани, Тошкент автомобиль ҳалқа йўли (Тошкент қишлоқ хўжалик маҳсулотлари улгуржи бозори маъмурияти) манзилида қабул қилинади, – дейилган хабарда.
Эслатиб ўтмиз, пойтахт ҳокимлиги 2021 йил декабрда “Қўйлиқ” бозори кўчирилиши ҳақида хабар берган эди. Бунда йўл инфратузилмасини яхшилаш, коммуникация тармоқларини такомиллаштириш ва тирбандликларнинг олдини олиш мақсад қилингани таъкидланган. Мазкур эълондан сўнг бозор бузилишидан норози одамлар кўчага чиққан, турли низолар юз берганди. Кейин бозор “Қўйлиқ”дан 6,5 километр узоқликда жойлашган Food City савдо мажмуасига кўчирилиши ҳақида хабарлар тарқалди.
2022 йил июнда собиқ шаҳар ҳокими Жаҳонгир Ортиқхўжаев бозор ҳудуди йўл ўтказгич қурилиши сабаб давлат эҳтиёжлари учун олиб қўйилишига рухсат берган қарор қабул қилган. Муҳокамалар авж олгач, ҳокимлик “Қўйлиқ” деҳқон бозорининг тўлиқ ҳудуди давлат ва жамият эҳтиёжлари учун олиб қўйилиши кўзда тутилмаганини маълум қилган.
“Асосий кириш жойи олдидаги автотураргоҳ ҳудудининг бир қисми ва бир нечта вақтинча савдо қурилмаларининг ўрни қурилиш жараёнига жалб этилади. Бунда асосий бино ва савдо расталарининг аксарияти ўз жойида қолади. Лойиҳага кўра, жалб этиладиган ҳудуднинг умумий майдони 10 минг кв.метр атрофида бўлади”, – дея ҳолатни изоҳлаган ҳокимлик.
Изоҳ (0)