Xalq deputatlari Toshkent shahar kengashi raisi Jahongir Ortiqxo‘jayevning 22-iyunda imzolagan qarori bilan “Qo‘yliq” dehqon bozori va “Qo‘yliq” universal savdo majmuasi obyektlari joylashgan yer uchastkalarini davlat va jamoat ehtiyojlari uchun olib qo‘yishga ruxsat berildi.
Hujjatda qayd etilishicha, Vazirlar Mahkamasining 2021-yil 12-iyuldagi maxsus farmoyishi bilan “Farg‘ona yo‘li” ko‘chasini Bektemir shossesi bilan bog‘lovchi Toshkent halqa avtomobil yo‘liga kirish va chiqish imkonini beruvchi yordamchi yo‘l o‘tkazgichlar qurish taklifiga rozilik berilgan.
Shu maqsadda Bektemir tumani, Toshkent avtomobil halqa yo‘li bo‘ylab joylashgan quyidagi ko‘chmas mulk obyektlariga o‘rnatilgan tartibda kompensatsiya berilganidan so‘ng, davlat va jamoat ehtiyojlari uchun olib qo‘yilishiga ruxsat berilgan.
“Qo‘yliq” bozori buzilishi yoki ko‘chishi haqida
2021-yilning dekabrida Toshkent shahar hokimligi “Qo‘yliq” dehqon bozori yo‘l kengaytirilishi sabab boshqa joyga ko‘chirilishini ma’lum qilgandi. Bozor Qo‘yliqdan 6,5 kilometr uzoqlikda, Toshkent viloyatida joylashgan Food City savdo majmuasiga ko‘chirilishi haqida xabarlar tarqaldi. Bunday qaror hukumat tomonidan 2017-yildayoq qabul qilinganini ma’lum bo‘ldi.
Bozorda savdo qiluvchi tadbirkorlar bu qarorga norozilik bildirgandi. Shundan so‘ng, “Qo‘yliq” dehqon bozori direktorining xavfsizlik bo‘yicha o‘rinbosari Qodirjon Normirzayev bozor buzilishi yoki ko‘chishi haqida xat yoki og‘zaki topshiriq berilmaganini, yangi ‘most’ hozircha loyiha ekani, uning qurilishiga ma’lum bir vaqt belgilanmaganini ma’lum qildi. Shuningdek, yo‘l o‘tkazgich qurilgan taqdirda ham, bozor orasida katta joy bor, aylanma yo‘l qilib, pastga tushirganda ham, bozorga xalaqit qilmasligini aytgandi.
Izoh (0)