Ijtimoiy tarmoqlarda Qo‘yliqdagi dehqon bozori va ulgurji bozor yaqinidagi avtomobil yo‘lini odamlar “jonli devor” hosil qilib to‘sishga urinayotgani aks etgan videoyozuvlar tarqaldi. Videoga olayotgan shaxsning izohiga ko‘ra, odamlar Qo‘yliq bozori yo‘l kengaytirilishi va yo‘l o‘tkazgich qurilishi munosabati bilan buzilishga tushgani va bozor hududiga kirish yopib qo‘yilganidan norozilik bildirib, yo‘lni to‘sishga chiqqan.
Bundan avvalroq ijtimoiy tarmoqlarlarda Qo‘yliqdagi ulgurji bozorida nizolar yuz berayotgani, bozorga yuklar kiritilmayotgani va barcha yuk mashinalar “Fudsiti”ga yo‘naltirilayotgani, bozordan faqat yuk olib chiqishga ruxsat berilayotgani, vaziyatdan norozi odamlar Toshkent halqa avtomobil yo‘lining Qo‘yliq bozorlari oldidan o‘tgan qismlarini to‘sgani haqida xabarlar tarqalgan edi.
“Daryo” vaziyat yuzasidan izoh olish maqsadida Toshkent shahar hokimligi, O‘zbekiston Ichki ishlar vazirligi hamda Toshkent shahar IIBB matbuot xizmatlariga murojaat qildi. Hokimlik matbuot xizmati so‘rovlarga javob bermagan bo‘lsa, huquq-tartibot organlari vakilari “vaziyat bo‘yicha ish olib borilayotgani”ni, yaqin vaqt ichida rasmiy izoh berilishini ma’lum qildi.
Eslatib o‘tamiz, Toshkent shahar hokimligi “Qo‘yliq” dehqon bozori yo‘l kengaytirilishi sabab boshqa joyga ko‘chirilishini ma’lum qilgandi.
Mavzuga doir:
- Buxoroda bir guruh ayollar yo‘lni to‘sib qo‘ydi. Voqea yuzasidan rasmiy izoh berildi
- Samarqandda gaz yo‘qligi sabab norozilik bildirib, yo‘lni to‘sgan fuqarolarning ikki nafari 5 sutkaga qamaldi, 11 nafariga jarima tayinlandi
- Andijonda viloyat hokimligi binosi oldidagi yo‘lni to‘sgan fuqarolarning 11 nafari 15 sutkagacha qamaldi, 6 nafari esa jarimaga tortildi
Izoh (0)