Олий Мажлис сенатори Толибжон Мадумаров Тошкентдаги «Қўйлиқ» бозори кўчирилиши ҳақида ҳали ҳоким қарори йўқлигини маълум қилди. Бу ҳақда 17 декабрь куни АОКА мажлислар залида Олий Мажлис Сенатининг йигирма иккинчи ялпи мажлиси якунларига бағишланган матбуот анжуманида айтиб ўтилди.
Журналистнинг «Қўйлиқ» бозори ҳақида берган саволига сенатор Толибжон Мадумаров жавоб берди.
«Биз ушбу масала ижтимоий тармоқда кенг жамоатчилик томонидан муҳокама қилингач, жойига чиқиб ўрганиш ишларини олиб бордик. ‘Қўйлиқ’ни кўчириш бўйича шаҳар ҳокимининг қарори чиқмаган, ҳозирда бозорнинг кўчирилиши ҳақида ҳеч қандай гап-сўз йўқ», – дейди Мадумаров.
Эслатиб ўтамиз, 7 декабрь куни Қўйлиқда йўл инфратузилмасини яхшилаш, коммуникация тармоқларини такомиллаштириш ва тирбандликларнинг олдини олиш мақсадида ушбу ҳудудда йўл кенгайиши ва кўприк қурилиши ишлари режалаштирилгани ва шу сабабли Тошкентдаги энг йирик бозорлардан бири бошқа манзилга кўчирилиши хабар қилинганди.
9 декабрь куни эса «бозор бузилишидан норози одамлар» катта автойўлни тўсиб қўйгани акс этган видеолавҳа тарқалди. «Дарё» вазият юзасидан изоҳ олиш мақсадида Тошкент шаҳар ҳокимлиги, Ички ишлар вазирлиги ҳамда Тошкент шаҳар ИИББ матбуот хизматларига мурожаат қилди. Ҳокимлик матбуот хизмати сўровларга жавоб бермаган бўлса, ҳуқуқ-тартибот органлари вакиллари «вазият бўйича иш олиб борилаётгани»ни, яқин вақт ичида расмий изоҳ берилишини маълум қилди.
Кейинроқ «Қўйлиқ» бозори Қўйлиқдан 6,5 километр узоқликда, Тошкент вилоятида жойлашган Food City савдо мажмуасига кўчирилиши ҳақида хабарлар тарқалди. Қайд этилишича, бозорини кўчириш тўғрисидаги қарор 2017 йилда қабул қилинган.
«Қўйлиқ» деҳқон бозори директорининг хавфсизлик бўйича ўринбосари Қодиржон Нормирзаевнинг берган маълумотига кўра эса, бозор бузилиши ёки кўчиши ҳақида шаҳар ҳокимияти томонидан хат ёки оғзаки топшириқ берилмаган.
Бектемир тумани ҳокими Тапил Маҳамадзияев эса «Қўйлиқ» бозори кўчирилишига оид хабарларга аниқлик киритиб, «Ўзим ҳам Қўйлиқдан бозор қиламан, лекин уни кўчирмасак бўлмайди», деганди.
Изоҳ (0)