Сирдарё вилоятида 2023 йилда ташкил этилган 2 минг 824 та якка тартибдаги тадбиркорлик субъектларининг 53,8 фоизи фаолиятини тўхтатиб қўйган. Бу ҳақда Маҳаллабай ишлаш ва тадбиркорликни ривожлантириш агентлиги директорига юборилган сенатор сўровида айтиб ўтилган.
Таъкидланишича, вилоятда ҳоким ёрдамчилари кўмагида микролойиҳалар ва микромарказлар ташкил этиш ҳисобига аҳоли бандлигининг таъминланиши режага нисбатан атиги 36 фоизни ташкил қилган.
Имконият ва шарт-шароитлар етарли бўлишига қарамасдан, Гулистон шаҳрида “аёллар дафтари”га киритилган 890 нафар ишсиз хотин-қиздан атиги 15 нафари доимий меҳнат билан банд. Оқолтин тумани ва Ширин шаҳрида эса бундай тоифадаги хотин-қизлар бандлигини таъминлашда субсидиялаш механизмидан умуман фойдаланилмаган.
Вилоятда 2023 йил мобайнида “20 минг тадбиркор — 500 минг малакали мутахассис” дастури доирасида 24 та тадбиркорлик субъекти томонидан тижорат банкларига жами 112,8 миллиард сўмлик кредит олиш учун киритилган аризаларнинг 17 тасига автоматик скоринг таҳлили орқали ижобий хулоса берилган бўлса-да, амалда бор-йўғи 2 нафар тадбиркорга кредит ажратилган.
Ҳокимликларга аҳоли ва тадбиркорлик субъектларининг тадбиркорлик масаласидаги мурожаатлари сони ўтган йилга нисбатан 2 баробарга ошган, — дейилади Сенат ахборотида.
Юқоридагилардан келиб чиқиб, Сенат агентлик директоридан амалга оширилаётган ишлар бўйича асослантирилган тушунтириш беришни сўраган. Шунингдек, сўровда маҳаллада бўш турган бино-иншоотлар ва ер майдонларини аниқлаш, уларни белгиланган тартибда аукцион савдоларига чиқариш юзасидан маълумот тақдим этилиши кўрсатиб ўтилган.
Изоҳ (0)