Путин Америкадаги президентлик сайлови натижаларини билмагунча, урушни тўхтатмайди — АҚШ давлат департаменти

Владимир Путин 2024 йил ноябрда бўлиб ўтадиган АҚШ президентлик сайлови натижаларини билмагунча, Украина билан тинчлик шартномаси тузмайди. Бу ҳақда АҚШ давлат департаментининг юқори мартабали расмийси ёпиқ матбуот анжуманида гапирди.

“Путин бизнинг сайловларимиз натижаларини кўрмасдан туриб тинчлик битимига ёки мазмунли тинчлик келишувига эриша олмайди, деб кутяпман”, — дея Reuters агентлиги номини ошкор қилмаслик шарти билан журналистларга интервью берган расмийнинг сўзларидан иқтибос келтирди.

Давлат департаменти вакилининг аниқлик киритишича, бу нафақат унинг шахсий фикри, балки “кенг тарқалган нуқтаи назар”дир.

“28 ноябрь куни Брюсселда бўлиб ўтган НАТО ташқи ишлар вазирларининг йиғилишида барча иттифоқчилар айнан ушбу контекстда Украинани қатъий қўллаб-қувватлашини билдирди”, — дея қўшимча қилди у.

АҚШ давлат департаменти баёноти бошқа республикачилар сингари Киевга кенг кўламли ҳарбий ёрдам кўрсатилишига қарши бўлган Дональд Трампнинг Оқ уйга қайтиши мумкинлиги ҳақидаги қўрқув кучайиб бораётган бир пайтда янгради, дейди Reuters.

Қўшма Штатлардаги жорий ижтимоий сўровлар шуни кўрсатадики, Дональд Трамп ва амалдаги давлат раҳбари Жо Байденнинг президентликка сайланиш имкониятлари тахминан тенг.

АҚШ Украинанинг энг йирик ҳарбий доноридир. Оқ уй маълумотларига кўра, Россиянинг кенг кўламли босқинининг бошидан бери Жо Байден маъмурияти Киевга ёрдам бериш учун 60 миллиард доллардан кўпроқ маблағ ажратган ва бу маблағларнинг 96 фоизи сарфланган.

АҚШ Конгресси Украина ва Исроилга ҳарбий ёрдам пакетларини ўз ичига олган йиллик бюджетни ҳали қабул қилгани йўқ. Октябрь ойида Байден Конгрессдан Украинага ёрдам бериш учун 61,4 миллиард доллар, Исроилга ёрдам бериш учун эса 14,3 миллиард доллар ажратишни сўраганди. Ноябрь ойи бошида республикачилар назоратидаги Вакиллар палатаси Исроилга 14,3 миллиард доллар ажратиш ҳақидаги қонун лойиҳасини қабул қилди. Украинага ёрдам бериш ушбу қонун лойиҳасига киритилмади. Демократлар бу ҳужжатни Сенатда блоклашди.

17 ноябрь куни Байден федерал ҳукуматни вақтинча молиялаштиришни давом эттириш тўғрисидаги қонунни имзолади, унга Исроил ва Украинага ёрдам харажатлари кирмайди.