11 март куни Ҳиндистон бош вазири Нарендра Моди янги фуқаролик тартиби тўғрисидаги қонун лойиҳасини парламент муҳокамасига киритди. Мазкур янги қонун мусулмон аҳолисига Ҳиндистон фуқаролигини олишда бир қатор чекловлар жорий этади. Бу ҳақда CNN нашри хабар берди.
Фуқаролик тўғрисидаги қонун Афғонистон, Бангладеш ва Покистондан келган муҳожирлар учун, агар улар мусулмон бўлмаса, мамлакат фуқаролигини олишда осонлаштирилган тартибларни кафолатлайди. Ушбу баҳсли қонун диний сабабларга кўра таъқибга учраган диний озчиликлар гуруҳлари: ҳиндулар, сикхлар, буддистлар, жайнистлар ва насронийлар учун фуқаролик тартибларини максимал енгиллаштиради.
Ҳиндистон етакчиси Моди ушбу қонун лойиҳаси ижобий воқеа эканлигини даъво қилишига қарамай, ҳукмрон партияга мухолиф партиялар арбоблари янги тартиблар дастурида Ҳиндистоннинг 200 миллионлик мусулмон аҳолиси четга суриб қўйилганини қаттиқ танқид остига олган. Ушбу қонун мамлакатда сепаратизм авж олишига сабаб бўлиши тўғрисида хавотирлар билдирилган.
Хабарда айтилишича, Нарендра Модининг ҳаракатлари Ҳиндистонни тўлиқ ҳинд мамлакатига айлантириш борасидаги стратегиянинг бошланиши бўлиб кўринмоқда. Модини қўллаб турган Бхаратия Жаната партияси диний ва этник сепаратизмга қарши курашиш ва цензурани кучайтириш билан бир қаторда, мамлакатда ярим аср давомида шаклланган демократик ахлоқ асосларига ҳам чуқур путур етказаётгани айтилган.
Изоҳ (0)