Hindiston hukumati musulmon aholisini kamsituvchi qonun loyihasini amalga kiritishni rejalashtirmoqda — CNN

11-mart kuni Hindiston bosh vaziri Narendra Modi yangi fuqarolik tartibi to‘g‘risidagi qonun loyihasini parlament muhokamasiga kiritdi. Mazkur yangi qonun musulmon aholisiga Hindiston fuqaroligini olishda bir qator cheklovlar joriy etadi. Bu haqda CNN nashri xabar berdi.

Fuqarolik to‘g‘risidagi qonun Afg‘oniston, Bangladesh va Pokistondan kelgan muhojirlar uchun, agar ular musulmon bo‘lmasa, mamlakat fuqaroligini olishda osonlashtirilgan tartiblarni kafolatlaydi. Ushbu bahsli qonun diniy sabablarga ko‘ra taʼqibga uchragan diniy ozchiliklar guruhlari: hindular, sikxlar, buddistlar, jaynistlar va nasroniylar uchun fuqarolik tartiblarini maksimal yengillashtiradi.

Hindiston yetakchisi Modi ushbu qonun loyihasi ijobiy voqea ekanligini daʼvo qilishiga qaramay, hukmron partiyaga muxolif partiyalar arboblari yangi tartiblar dasturida Hindistonning 200 millionlik musulmon aholisi chetga surib qo‘yilganini qattiq tanqid ostiga olgan. Ushbu qonun mamlakatda separatizm avj olishiga sabab bo‘lishi to‘g‘risida xavotirlar bildirilgan.

Xabarda aytilishicha, Narendra Modining harakatlari Hindistonni to‘liq hind mamlakatiga aylantirish borasidagi strategiyaning boshlanishi bo‘lib ko‘rinmoqda. Modini qo‘llab turgan Bxaratiya Janata partiyasi diniy va etnik separatizmga qarshi kurashish va senzurani kuchaytirish bilan bir qatorda, mamlakatda yarim asr davomida shakllangan demokratik axloq asoslariga ham chuqur putur yetkazayotgani aytilgan.