Ғазода махсус ҳарбий амалиёт ўтаётган Исроил мудофаа кучлари 7 октябрдан бери озиқ-овқат карвонларини кутаётган 400 дан ортиқ ғазоликни отиб ўлдирган. Бу ҳақда Al Jazeera нашри Фаластин маҳаллий нашрлари тарқатган маълумотларга асосланиб, хабар берди.
Хабарда айтилишича, ёрдам кутаётганларга нисбатан сўнгги ҳужум 12 март тонгида содир бўлган. Исроил ҳарбийлари Ғазо шаҳридаги Кувайт чорраҳасида йиғилиб турган оломонга огоҳлантирмасдан ўқ узган. Оқибатда 11 нафар аҳоли вакили воқеа жойида вафот этган. 20 га яқин ғазоликлар касалхоналарга жойлаштирилган.
Европа кенгаши Исроил ҳукуматини ҳозирда бир миллиондан ортиқ фаластинликлар жамланган Рафаҳда қуруқлик операцияси ўтказиш режасидан воз кечишга чақирган. Операциянинг давом этиши қурбонларни мислсиз даражада кўпайтириши айтилган.
Ғазода ҳозиргача вафот этган маҳаллий аҳоли сони 32 мингга яқинлашди. Шундан 10 мингга яқини болалардир. Ҳудудга сўнгги 7 кун давомида қуруқликдан бирорта ҳам ёрдам карвони кирмади. Ҳаводан етказилаётган асосий ёрдам эса Иордания, Қатар ва АҚШ юклари ҳисобланади.
Изоҳ (0)