Қалин ва узун сочлар, чиройли юз териси ва жозибали кўзлар ҳинд аёлларига табиат томонидан инъом этилган деб фикрлайди кўпчилик. Аслида эса ҳиндистонлик аёллар бунга меҳнат ва алоҳида парвариш орқали эришади ҳамда уларнинг гўзаллик сирлари авлоддан-авлодга ўтиб келади. Уларнинг асоси табиий маҳсулотлардан тайёрланадиган косметик воситалар ва доимий парвариш кун тартибининг ажралмас қисмига айланганидадир.
Кокос мойи
Кокос мойи энг кенг тарқалган косметик маҳсулот бўлиб, у терини ва сочни озиқлантиради, намлайди ва хушбўй ҳис таратади. Сочлари яхши ўсиши ва қалин бўлишини таъминлаш учун ҳинд қизлари ювинишдан аввал бош терисини кокос мойи билан уқалайди ва ниқобни 30 дақиқага қолдиради. Болливуд ва Голливуднинг ёрқин актрисаси Приянка Чопра кокос мойидан мунтазам фойдаланиши ва уни намлантирувчи энг яхши восита эканлигини таъкидлаган.
Куркума (зарчава)
Куркума — бу ҳинд аёллари томонидан гўзаллик муолажаларида фаол қўлланиладиган сариқ рангли зиравор. У юз терисини оқартириш, ҳуснбузарлар ва ажинга қарши курашда ёрдам берадиган воситадир.
Масалан, соҳибжамол ҳинд актрисаси Дипика Падуконе табиий йогурт ва куркумани бир хил массада аралаштириб, озгина лимон суви қўшилган ниқобдан тез-тез фойдаланади. Мазкур аралашма юзда узоғи билан 15-20 дақиқа туради, акс ҳолда ундаги куркумин моддаси юзни қиздириши ва тери рангини ўзгартириши мумкин.
Творог
Творог маҳсулоти соч учун ниқоблар тайёрлашда ҳинд аёллари томонидан кенг қўлланилади. Қуруқ сочларни тиклаш учун ярим стакан творогни иккита тухум ва икки ош қошиқ бодом ёғи билан аралаштиринг, ниқобни бош терисига суртинг ва ярим соатга қолдиринг. Сўнг сочларингизни шампун билан яхшилаб ювиб ташлаш лозим.
Атиргул суви
Атиргул суви таркибидаги элементлар тери учун табиий тозалаш воситаси ҳисобланади. У юзнинг ортиқча ёғланишини олдини олишга ёрдам беради, терининг қизаришини камайтиради, намлайди ва қулайлик ҳисси беради. Атиргул суви табиий гул баргларидан тайёрланганлиги сабабли у ҳеч қандай ножўя таъсирга эга эмас ва тери туридан қатъий назар барча аёл-қизлар фойдаланиши мумкин.
Атиргул суви совутиш таъсирига эга бўлганлиги сабабли кўп терлашга мойил бўлган ёки қизил юзли аёллар учун кони фойдадир.
Асал
Асал ҳинд аёллари томонидан косметик мақсадларда ишлатиладиган энг севимли маҳсулотлардан биридир. Унинг таркибига киритилган антиоксидантлар ва шифобахш витаминлар терини намлайди, унинг янгиланишига ёрдам беради, ҳуснбузарлар, чандиқлар ва куйиш изларини даволайди, сочни тиклайди.
Ҳиндистонлик мафтункор актриса Алия Бҳатт шакар ва асалдан скраб тайёрлашни яхши кўради. Ушбу ниқоб терини тозалайди ва юзга юмшоқлик бахш этади.
Тери ва сочни намлаш учун ҳинд қизлари асални оз миқдорда жожоба мойи билан аралаштириб ниқоб тайёрлайдилар.
Изоҳ (0)