Жорий йилнинг 5 март куни “Толибон” мудофаа вазири Муҳаммад Ёқуб Мужоҳид ва Қуролли кучлар бош штаби бошлиғи Қори Фасиҳуддин Фитрат Қатарда ўтказилган мудофаа саноати маҳсулотлари кўргазмасига ташриф буюрган эди. Сиёсатшунос Суҳроб Бўронов “Дарё”га “Толибон” мудофаа вазирининг Қатарга ташрифи борасида ўз фикр-мулоҳазаларини билдириб ўтди.
Афғоншунос олимнинг таъкидлашича, бу Муҳаммад Ёқубнинг Қатарга илк ташрифи эмас, икки томон ҳарбий раҳбари олдин ҳам учрашган.
Икки томон ўртасидаги ҳарбий раҳбарларнинг бу сингари учрашуви биринчиси марта эмас. Аввалроқ ҳам “Толибон” Мудофаа вазири Мулла Яъқуб Қатарга бир неча марта ташриф буюрган ва Қатар ҳарбий вакиллари билан биргаликда Қатар амири билан ҳам кўришишга муваффақ бўлган, — дейди сиёсатшунос.
Суҳроб Бўроновнинг қўшимча қилишича, бир вақтлар Покистон томонидан ҳарбий кўмак олган “Толибон” бугунги кунда Исломобод билан муносабатларининг совуқлашиши ортидан АҚШ ва унинг иттифоқчиси бўлмиш Қатар билан алоқаларини яхшилашга уринмоқда.
Мулла Яъқуб “Толибон” ҳаракатининг биринчи раҳбари Мулла Умарнинг ўғли. У “Толибон” кучларининг ҳарбий қаноти ҳисобланган “Ҳаққоний тармоғи” фаолиятига катта таъсир ўтказа олади. Бу жиҳатдан айтганда, бир вақтлар Покистон томонидан ҳарбий кўмак олган “Толибон” бугунги кунда Исломобод билан муносабатларининг совуқлашиши ортидан АҚШ ва унинг иттифоқчиси бўлмиш Қатар томонидан нафақат молиявий ёрдам, балки кутилган ҳарбий қуролларни олиш хусусида келишаётган бўлиши мумкин, — деди сиёсатшунос Суҳроб Бўронов.
Маълумот ўрнида, Қатар пойтахти Доҳада бўлиб ўтган Димдех номли кўргазмада турли ширкатларнинг ҳарбий техника ва воситалари намойиш этилган. Унда бошқа мамлакатларнинг мудофаа вазирлари ва ҳарбий амалдорлари ҳам иштирок этган.
Изоҳ (0)