Исроил ҳукумати халқаро ҳамжамият босими остида Ғазо секторининг шимолига инсонпарварлик ёрдамини мамлакатдан тўғридан-тўғри етказиб беришга рухсат беришни режалаштирмоқда, шунингдек, Кипрдан инсонпарварлик ёрдами етказиб бериш учун денгиз йўлини яратишда ҳамкорлик қилади. Бу ҳақда Исроилнинг икки расмийсига таяниб, Associated Press хабар берди.
AP суҳбатдошларидан бирининг айтишича, Исроил анклавнинг шимолий қисмига гуманитар ёрдам олиб борувчи 20-30 та юк машинасига рухсат беради, бу эса бу йўналишда мунтазам етказиб беришнинг бошланиши ҳисобланади.
Бундан ташқари, 10 март куни Исроил Кипр ҳудудидан гуманитар ёрдам етказилиши учун денгиз йўли хавфсизлигини текширишни бошлайди. Гуманитар юкларни ташувчи биринчи кема денгиз йўлидан фойдаланиш имкониятини синовдан ўтказиш бўйича пилот лойиҳанинг бир қисми бўлади.
Янги йўналишлар бўйлаб етказиладиган ёрдам АҚШ кўмагида БАА томонидан молиялаштирилади, дея хабар беради агентлик.
7 март куни эрталаб ташкилотнинг Фаластин ҳудудларига ёрдам кўрсатиш бўйича координатори Жейми МакГолдрик БМТ экспертлари Ғазо сектори шимолига гуманитар юкларни етказиш учун Исроил ҳарбий йўлидан фойдаланиш имкониятларини ўрганишини маълум қилганди.
МакГолдрикнинг сўзларига кўра, 29 февраль куни озиқ-овқат ва дори-дармон ортилган юк машиналари келганидан кейин исроиллик ҳарбийлар билан тўқнашувлар рўй бергани ва бунинг оқибатида 100 дан ортиқ фаластинлик ҳалок бўлганидан сўнг, Исроил ўтган ҳафта бу муаммони ҳал қилишда иштирок этган.
Изоҳ (0)