Москвада хавфсизлик кучлари марҳум мухолифатчи Алексей Навальний хотирасига гул қўйганларни яна ҳибсга олишни бошлади. Инсон ҳуқуқлари бўйича “ОВД-Инфо” лойиҳаси 5 март куни тўрт нафар шахс ҳибсга олингани ҳақида хабар берди.
Унга кўра, полиция Москвада яшовчи Полина Орехованинг уйига келган. У 17 февраль куни митинг тартибини бузганлиги учун Россия Федерацияси Маъмурий кодексининг 20.2-моддаси билан айбланмоқда. Орехова Останкинское полиция бўлимига олиб кетилиб, шахсий буюмлари, жумладан, мобил телефони ҳам олиб қўйилган, дейди ҳуқуқ фаоллари.
Ҳуқуқ ҳимоячиларининг қайд этишича, ўша куни эрталаб яна бир фуқаро ушланиб, полиция бўлимига олиб кетилган. Эркак қандай жиноятда айбланаётгани номаълум. Комлев 16 ва 17 февраль кунлари Навальний хотирасига гул қўйган, 1 март куни унинг дафн маросимида ҳам қатнашган. Хавфсизлик кучлари унинг шахсини видеокузатув камералари орқали аниқлаганликларини айтишган.
Бундан ташқари, “Э” маркази ходимлари Елена Грибковани қўлга олиб, Даниловский туманидаги Ички ишлар вазирлигига олиб кетишган, деб хабар беради “ОВД-Инфо”. Маълум қилинишича, Грибкова 1 март куни Алексей Навальнийнинг дафн маросимига борган, 17 февраль куни эса аёл мухолифатчи хотирасига бағишланган митингда ҳибсга олинган, бироқ огоҳлантириш билан қўйиб юборилган.
Пойтахтда қўлга олинган Елена Левина Новогиреево тумани полиция бўлимига олиб кетилди, деб ёзади ҳуқуқ фаоллари. Илгари Левина 17 февраль куни Ғам деворига гул қўйгани учун ҳибсга олинган, бироқ ўша куни огоҳлантириш билан қўйиб юборилган, дея қўшимча қилади “ОВД-Инфо”.
Изоҳ (0)