Жиззах вилоятида фуқарони ишга жойлаштириш учун 6 миллион сўм пул олган икки аёл қўлга олинди. Бу ҳақда “Маҳалла” телеканали орқали эфирга узатилган лавҳада маълум қилинди.
Қайд этилишича, Жиззах вилояти ИИБ Тезкор-қидирув хизмати Жиноят қидирув бошқармаси, Коррупция ва иқтисодий жиноятларга қарши курашиш бўлими ҳамда ИИВ Шахсий хавфсизлик бош бошқармаси вилоят бўлими ходимлари ҳамкорлигида тезкор тадбир ўтказилган. Тадбирда Жиззах шаҳри ва Шароф Рашидов туманида яшовчи икки нафар аёл бир фуқародан 6 миллион сўм олганида ушланган.
Маълум бўлишича, ушбу аёллар Жиззах темирйўл вокзалида ишловчи танишлари орқали Шароф Рашидов тумани “Катта қишлоқ” МФЙда яшовчи 38 ёшли фуқарога эркин ёлланувчи қўриқлаш хизматига ишга киритишни ваъда қилиб, ундан 500 доллар талаб қилган.
Ҳолат юзасидан Жиноят кодексининг тегишли моддалари билан жиноят иши қўзғатилиб, дастлабки тергов ҳаракатлари олиб борилмоқда. Аниқланишича, Жиззах вилояти кўп тармоқли тиббиёт марказида ҳамшира бўлиб ишлаган гумонланувчилардан бири муқаддам фирибгарлик жинояти учун судланган.
Бундан олдин Самарқандда Миллий гвардияга ишга киритиб қўйишни ваъда қилиб, 27 минг АҚШ долларини ўзлаштирган фуқарога жиноят иши қўзғатилгани, Бухорода фуқарони Миллий гвардияга ишга қўйиш эвазига 2 000 доллар олган шахслар ушлангани, Самарқандда ҳарбий олийгоҳлар ва Темурбеклар мактабига ўқишга киритишини айтиб, фуқаролардан қарийб 10 500 доллар пул олган аёл қўлга олингани тўғрисида хабар берилганди.
Изоҳ (0)