Jizzax viloyatida fuqaroni ishga joylashtirish uchun 6 million so‘m pul olgan ikki ayol qo‘lga olindi. Bu haqda “Mahalla” telekanali orqali efirga uzatilgan lavhada ma’lum qilindi.
Qayd etilishicha, Jizzax viloyati IIB Tezkor-qidiruv xizmati Jinoyat qidiruv boshqarmasi, Korrupsiya va iqtisodiy jinoyatlarga qarshi kurashish bo‘limi hamda IIV Shaxsiy xavfsizlik bosh boshqarmasi viloyat bo‘limi xodimlari hamkorligida tezkor tadbir o‘tkazilgan. Tadbirda Jizzax shahri va Sharof Rashidov tumanida yashovchi ikki nafar ayol bir fuqarodan 6 million so‘m olganida ushlangan.
Ma’lum bo‘lishicha, ushbu ayollar Jizzax temiryo‘l vokzalida ishlovchi tanishlari orqali Sharof Rashidov tumani “Katta qishloq” MFYda yashovchi 38 yoshli fuqaroga erkin yollanuvchi qo‘riqlash xizmatiga ishga kiritishni va’da qilib, undan 500 dollar talab qilgan.
Holat yuzasidan Jinoyat kodeksining tegishli moddalari bilan jinoyat ishi qo‘zg‘atilib, dastlabki tergov harakatlari olib borilmoqda. Aniqlanishicha, Jizzax viloyati ko‘p tarmoqli tibbiyot markazida hamshira bo‘lib ishlagan gumonlanuvchilardan biri muqaddam firibgarlik jinoyati uchun sudlangan.
Bundan oldin Samarqandda Milliy gvardiyaga ishga kiritib qo‘yishni va’da qilib, 27 ming AQSH dollarini o‘zlashtirgan fuqaroga jinoyat ishi qo‘zg‘atilgani, Buxoroda fuqaroni Milliy gvardiyaga ishga qo‘yish evaziga 2 000 dollar olgan shaxslar ushlangani, Samarqandda harbiy oliygohlar va Temurbeklar maktabiga o‘qishga kiritishini aytib, fuqarolardan qariyb 10 500 dollar pul olgan ayol qo‘lga olingani to‘g‘risida xabar berilgandi.
Izoh (0)