Қашқадарё вилояти Кўкдала туманида кредит маблағини ноқонуний йўллар билан нақдлаштириб олган МЧЖ раҳбари аниқланди, деб хабар беради Бош прокуратура ҳузуридаги департамент.
Қайд этилишича, департаментнинг Кўкдала туман бўлими томонидан терговга қадар текширув ўтказилган. Текширувда “Х.Ф.” МЧЖ раҳбари Х.Х. иш юритувчиси А.Й. ва бошқалар ҳудудий тижорат банки филиалидан ажратилган 1,5 миллиард сўм кредит маблағлари эвазига шартномада кўрсатилган қурилиш моллари ва темир-бетон маҳсулотларини сотиб олмасдан ушбу маблағларнинг 1,2 миллиард сўмини “У.Қ.” МЧЖга ўтказиш орқали нақдлаштириб олгани аниқланган.
Мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) билан жиноят ишлари қўзғатилиб, тергов ҳаракатлари ўтказилмоқда.
Аввалроқ Хоразм вилоятида 1,4 миллиард сўм кредит маблағини ноқонуний четга олиб чиққан шахслар аниқлангани тўғрисида хабар берилганди.
Изоҳ (0)