“Миллий гвардия мактабда фаолият кўрсатиши учун махсус тайёргарликдан ўтиши керак” — Жамшид Муслимов

Иқтисодий таҳлилчи Жамшид Муслимов “Дарё” билан суҳбатда ҳокимларни таълим масалаларига аралашиб, мактаб директорлари ва ўқитувчиларга маслаҳат беришини нотўғри иш эканини айтиб ўтди.

Таҳлилчининг сўзларига кўра, мактаблар учта бошқарув бўғинлари билан тартибга солиниши керак. Улардан биринчиси - таълим вазирлиги, иккинчиси - профессионал ўқитувчилар уюшмаси, учинчиси – мактабдаги ота-оналар жамоатчилиги.

Ҳокимиятни иши — бу муниципал вазифа. Улар ҳокимият мактабларни электр энергияси, сув ва иссиқлик билан таъминлаши керак. Агар мактаб бюджети ҳокимият бюджетига боғланган бўлса, мана шу сметана ижро этиш. Ҳокимларни бошқа ишларга аралашишга ҳаққи йўқ. Сайловларни ҳам мактабларда уюштиришни бас қилиш керак. Тўғри, мактаб майдончалари сайлов учун керакдир, лекин ўқитувчиларга тегиш керак эмас, – дейди Жамшид Муслимов.

Иқтисодий таҳлилчи суҳбат давомида мактабларда миллий гвардия ходимларининг фаолият олиб бориши ҳақида ўз фикрларини билдириб ўтди.

Болаларнинг хулқи оғирлиги ва унинг салбий таъсирлари ҳам тизимли, ҳам табиий муаммо. Бундай муаммо барча жамиятларда бор. Яъни жамиятлар учун табиий ҳолат. Бу вазиятда велосипед ихтиро қилиш керак эмас. Бу масала билан шуғулланса бўлади. Чунки бу бир вақтлар фан даражасида ўрганилган. Ҳозир шуни ташкил қилиш керак халос. Биринчи галда, мактабдаги хулқи оғир болалар билан шуғулланадиган мутахассиснинг ҳуқуқи ва билими бўлиши керак. Ички ишлар вазирлигида хулқи оғир болалар билан шуғулланадиган мутахассислар мавжуд. Агар уларни сони кам бўлса, уларни кўпайтириш зарур ва улар махсус тайёргарликдан ўтишлари керак.

Мактаб болалари сўроқ қилинадиган бўлса, бу фақат ва фақат ота-оналарнинг розилиги ва иштирокида амалга оширилиши керак. Ўқитувчилар бўлса, фақат улар мактаб доирасида сўроқ қилишлари мумкин. Болаларга ўта ваҳшийлик қилиш хос одат. Лекин бу билан шуғулланиш ҳар кимнинг вазифаси эмас. Агар миллий гвардия ходимлари шу иш билан шуғулланмоқчи бўлса, ходимлар махсус курсларни ўқиб тугатиши зарур. Яъни уларни қўлида йўриқнома бўлиши керак.

Тўғри, болаларни чўнтагида пичоқ бўлиши мумкин. Бунда боланинг ҳуқуқлари таъминланган ҳолда, ота-она ёки мактаб директорининг ҳузурида боланинг чўнтаклари текширилиши керак. Бу ерда “боланинг ҳуқуқи катта одамнинг ҳуқуқидан устунроқми”, деган савол туғилади. Бола биринчи галда — бола, у кўп нарсани англамайди. Шунинг учун у ўзини ҳимоя қила олмайди. Шунинг учун уларнинг ҳуқуқига эътибор қилиш зарур, – деди иқтисодий таҳлилчи.

Жамшид Муслимовнинг таъкидлашича, тайёргарликдан ўтмаган миллий гвардия ходимларини мактабга жалб қилиш худди ёнғинга қарши тайёргарликдан ўтмаган ўт ўчирувчиларни юборишга ўхшайди. Шунинг учун миллий гвардия болалар гвардияси бўладиган бўлса, улар махсус тайёргарликдан ўтиши керак.