Қорақалпоғистондаги 7 та заправкада сифатсиз бензин сотилгани аниқланиб, чора кўрилди. Бу ҳақда Рақобатни ривожлантириш ва истеъмолчилар ҳуқуқларини ҳимоя қилиш қўмитаси хабар берди.
Маълум қилинишича, аҳолини сифатли бензин маҳсулотлари билан таъминлаш мақсадида Қорақалпоғистон Республикасида иш юритувчи “Рафс” SIЧК, “Рухшона Ҳамид” МЧЖ, “Сувиншоатгазқурилиш” ХК, “Имкон-Ҳамкор” ХК, “Руслан” ФХ, “Тўрткўлли Бунёд Оил” МЧЖ ҳамда “Гулнора Газ Сервис” МЧЖларга қарашли АЁҚШларда ёқилғи маҳсулотлари сифатини ўрганиш бўйича назорат тадбирлари ўтказилган.
Ушбу ёнилғи қуйиш шохобчаларидан бензин маҳсулотлари харид қилиниб, белгиланган тартибда тегишли лабораторияларга тақдим этилган. Лаборатория таҳлиллари 7 та хизмат кўрсатувчи шохобчанинг бензин маҳсулотларини сифатсизлиги бўйича хулоса берган.
Мазкур хулосага кўра ёнилғи қуйиш шохобчаларидан намуна олинган Аи-92 бензиннинг таркибидаги октаннинг норматив ҳужжат талабига кўра 92,0 бўлиши кераклиги, лекин текшириш натижасида ушбу кўрсаткич шохобчалардан олинган намуна ёқилғи маҳсулотларида 90 га ҳам етмагани, сифат талабига жавоб бермаслиги аниқланган.
Қўмита томонидан олиб борилган ўрганишлардан маълум бўлишича, АЁҚШларда 2023 йил Аи-92 маркали сифатсиз жами 26 минг литрдан зиёд автобензин сотилган, бунинг натижасида истеъмолчиларга жами 277 миллион сўм зарар етказилган.
Ўтказилган текшириш натижалари бўйича қўмитанинг махсус комиссияси томонидан юқорида кўрсатилган хўжалик юритувчи субъектларга нисбатан “Истеъмолчилар ҳуқуқларини ҳимоя қилиш тўғрисида”ги қонунининг тегишли моддаси талаби бузилиши ҳолатлари бўйича қонунчиликда белгиланган тартибда иш қўзғатилиб, қарор, кўрсатмалар берилган.
Изоҳ (0)