АҚШ Халқаро тараққиёт агентлиги (USAID) Ўзбекистон Энергетика вазирлиги ва энергетика сектори манфаатдор томонлари билан тоза энергия мақсадларини қўллаб-қувватлашга қаратилган янги ташаббус – Яшил водород хабини ишга тушириш устида ишламоқда. Бу ҳақда АҚШнинг мамлакатдаги элчихонаси хабар берди.
Хаб минтақанинг келажакдаги энергетика ландшафтини шакллантириш ва Ўзбекистоннинг “Қайта тикланувчи ва водород энергиясини ривожлантириш стратегияси”га ҳисса қўшиш учун энергия сектори ходимларининг янги тоза энергия технологиялари бўйича малакасини оширишга ёрдам беради.
Учрашувда энергетика вазири ўринбосари Умид Мамадаминов ва энергетика секторининг асосий манфаатдор томонлари Водород хаби концепциясининг дастлабки босқичини, хусусан, устувор йўналишлар ҳамда ҳаракатлар босқичларини муҳокама қилдилар.
USAID Марказий Осиё давлатларини тоза энергия ва бошқа энергетиканинг устувор йўналишларни ривожлантиришда қўллаб-қувватлашга содиқдир. Бу шунчаки мақсад эмас, балки зарурат ҳамдир. Бизнинг ишончимиз барқарор келажак тоза ва самаралироқ энергия манбаларига ўтишда жамоавий саъй-ҳаракатларга боғлиқ деган ишончга асосланади, — дейди USAID’нинг Ўзбекистондаги миссияси директори вазифасини бажарувчи Эдвард Михалски.
Аввалроқ USAID Делавер университети (АҚШ) ва Тошкент давлат техника университети ўртасида университетнинг магистратура босқичига киритилган яшил водород бўйича янги ўқув дастурини амалга ошириш мақсадида ҳамкорлик ўрнатган эди.
Яшил водород хаби концепцияси муваффақиятли амалга оширишнинг асосий жиҳатларини, жумладан, қайта тикланадиган энергия салоҳияти, сув мавжудлиги, тоза водород ишлаб чиқариш усуллари ва экспорт салоҳиятини баҳолайди. Ҳудудни баҳолаш, омборхона иншоот лойиҳаси, логистикани режалаштириш, бозор таҳлили, тартибга солишни баҳолаш ва атроф-муҳитга таъсир қилиш масалалари фаолият юритиш учун оптимал жойларни аниқлашнинг бошқа таркибий қисмларидан биридир.
Бу иш USAID’нинг Марказий Осиёда Энергия минтақавий энергетика лойиҳаси доирасида амалга оширилмоқда. Беш йилга мўлжалланган қиймати 39 миллион долларга тенг лойиҳа энергетика сектори самарадорлигини ошириш, тоза энергия ривожланишини жадаллаштириш, минтақавий алоқа ва трансчегаравий энергия савдоси орқали энергия хавфсизлиги ва барқарорлигини мустаҳкамлашга қаратилган. Фақатгина ушбу лойиҳа орқали USAID тоза энергияга 2,2 миллиард доллар миқдорида сармоя киритган ва шу кунгача Марказий Осиё бўйлаб 2241 мегаватт тоза энергия қувватини ўрнатишга ҳисса қўшган.
Изоҳ (0)