Ижтимоий тармоқларда Жиззах вилояти ҳокимининг 7,5 йилга қамалган собиқ ўринбосари Акром Раҳмонқулов озодликка чиқарилгани ҳақида хабарлар тарқалди. “Дарё” бунга аниқлик киритиш мақсадида Олий суд матбуот котиби билан боғланди.
2021 йил 29 декабрь куни Тошкент вилоят судида Акром Раҳмонқуловга оид жиноий иш кўриб чиқилган. Жиззах вилояти ҳокими ўринбосари лавозимида ишлаган Акром Раҳмонқулов ва бошқаларга оид жиноят иши юзасидан эълон қилинган суд ҳукмига кўра:
Акром Раҳмонқулов Жиноят кодексининг 167-моддаси 3-қисми “а”, “в” бандлари (ўзлаштириш ёки растрата йўли билан талон-торож қилиш), 184-моддаси 3-қисми (солиқлар ёки бошқа мажбурий тўловларни тўлашдан бўйин товлаш), 189-моддаси 1-қисми (савдо ёки хизмат кўрсатиш қоидаларини бузиш), 205-моддаси 2-қисми “а”, “б” бандлари (ҳокимият ёки мансаб ваколатини суиистеъмол қилиш), 207-моддаси 1-қисми (мансабга совуққонлик билан қараш), 209-моддаси 2-қисми “а”, “б” бандлари (мансаб сохтакорлиги), 243-моддасида (жиноий фаолиятдан олинган даромадларни легаллаштириш) назарда тутилган жиноятларни содир қилганликда айбдор деб топилган.
У 2 йил муддатга мансабдорлик ва моддий жавобгарлик лавозимларида ишлаш ҳуқуқидан маҳрум қилиниб, 7 йил 6 ой озодликдан маҳрум қилиш жазоси ҳамда базавий ҳисоблаш миқдорининг 500 баравари миқдорида яъни, 111 500 000 сўм жарима жазоси тайинланган.
Шунингдек, суд ҳукми билан Акбар Раҳмонқулов (“Ж-Қурувчи” МЧЖ директори), Алишер Раҳмонқулов (“Ravon Йўл Инвест” МЧЖ, “Согдиана пипепласт” МЧЖ ва “Жиззах савдо люкс” МЧЖлар директори), Аброр Раҳмонқулов (“Зенаткор Сайҳан Кон Саноат” МЧЖ директори), Адҳам Раҳмонқулов (“Зенаткор темир бетон буюмлари” МЧЖ директори) ва яна 20 дан ортиқ шахсга турли жазолар тайинланган.
Тармоқларда Акром Раҳмонқуловнинг озодликка чиқарилгани ҳақидаги хабарлар эса ўз тасдиғини топмади. Олий суд Акром Раҳмонқулов ҳозирда Тошкент вилоятидаги манзил колонияда жазо ўтаётганини маълум қилди.
Эслатиб ўтамиз, 2021 йил 10 январь куни Жиззах шаҳрида янги қурилаётган кўп қаватли уйнинг бир қисми қулаб тушган эди. ФВВ ва Бош прокуратуранинг қайд этишича, воқеа оқибатида тан жароҳати олган ва ҳалок бўлган фуқаролар бўлмаган. Маълум қилинишича, қулаб тушган бино ёнидаги 6 қаватли иншоотнинг ҳам пойдеворларида чўкиш аломатлари кузатилган бўлиб, ҳозирда у хавфли ҳолатда турибди. Ҳалокатни ўрганиш мақсадида бош вазирнинг биринчи ўринбосари Очилбой Раматов бошлиқ ҳукумат комиссияси тузилган. Шунингдек, мазкур ҳолат юзасидан ўтказилган терговга қадар текширув натижасига кўра, Жиззах вилояти қурилиш соҳасида ҳудудий назорат инспекцияси мансабдор шахсларига нисбатан Жиноят кодексининг 207-моддаси (мансабга совуққонлик билан қараш) билан жиноят иши қўзғатилган.
Маълумот учун, Жиззах вилояти ҳокимининг собиқ ўринбосари Акром Раҳмонқулов 2018 йилда лавозимга тайинлангач, уюшган жиноий гуруҳ тузиб, 494 миллиард сўмлик 82 та объектда қурилиш-таъмирлаш ишларини ўзининг раҳнамолигидаги 9 та пудрат ташкилотига топшириб, қурилиш ишлари ҳажмини сунъий равишда оширилган нархларда расмийлаштириш, қўшиб ёзиш орқали қарийб 20 миллиард сўмлик бюджет маблағларини талон-торож қилганди. Бош прокуратура бу ҳозиргача терговда аниқланган маълумотлар эканини айтганди.
Изоҳ (0)