O‘zbekistonda 65 nafar bola o‘limiga sabab ekani aytilayotgan “Dok-1 Maks” siropi bo‘yicha bo‘lib o‘tayotgan sud majlislarida hindistonlik tadbirkor o‘ziga tegishli korxonaga inspeksion tekshiruv tushishining oldini olish, shuningdek, buning nazdida O‘zbekiston hududiga “Dok-1 Maks” siropi kabi yana bir talabga javob bermaydigan doriga ruxsat olishga uringani maʼlum bo‘lgandi. Navbatdagi sud majlisida so‘z olgan agentlikning sobiq xodimi 33 ming dollar voqeasiga qo‘shimcha kiritdi.
2022-yilning iyul oyi o‘rtalari yoki oxirlaridami hamkasbim, rahbarning birinchi o‘rinbosari A.A.ning xizmat xonasiga ish bilan kirdim. Hamkasbim o‘sha paytdagi rahbar S.K.dan bir qancha topshiriqlar kelib tushganini, topshiriqlar orasida ikkita firmani “inspeksiyadan yechish” bo‘yicha topshiriq ham bo‘lganini aytib, shu topshiriq bo‘yicha ish yuritilishi kerakligini qo‘shimcha qildi.
Men rahbardan shunday topshiriq tushdimi, deb hayratlanganimda A.A. rahbardan kelgan topshiriqni Telegram’da qabul qilib olganini aytib, yozishmalarini menga ko‘rsatdi. Topshiriqda ikkita firmaning nomi yozilgan ekan. Shundan so‘ng A.A. ekspertlar kengashi kotibi U.T.ni chaqirib, rahbar topshirig‘ini aytdi. Shunda u bu topshiriqni shaxsan rahbar berdimi, men bunga aniqlik kiritishim kerak deb xonadan chiqib ketdi, — deydi sobiq rahbarini ayblagan sudlanuvchi N.M.
Sudlanuvchining aytishicha, dastlabki tergov harakatlari davomida U.T. vaziyatga aniqlik kiritish uchun Farmatsevtika tarmog‘ini rivojlantirish agentligi sobiq rahbari qabulida bo‘lib, ikkita firmaga nisbatan tayinlangan tekshiruvni bekor qilish haqida qatʼiy topshiriq berilganiga ishonch hosil qilgan.
Sudda mazkur ayblovni rad etgan Farmatsevtika tarmog‘ini rivojlantirish agentligining sobiq rahbari S.K. firmalarga tayinlangan inspeksion tekshiruvni rad etganini bildirib, bu haqdagi hujjatga bilmasdan imzo qo‘yib yuborgan bo‘lishi mumkinligini aytdi.
Menga kuniga 15-20 talab hujjat olib kirilib, imzo qo‘yilardi. Bu hujjat ham hujjatlar orasiga tushib qolgan va bilmasdan imzo qo‘yib yuborgan bo‘lishim mumkin, — deydi S.K.
Avvalroq sud majlislarining birida hindistonlik tadbirkor korxonasiga kelishi aytilgan inspeksion tekshiruvni to‘xtatish yana bir yaroqsiz doriga ruxsat olish uchun 33 ming dollar pora berganini tan olgandi.
Qayd etilishicha, Marion Biotech Pvt. Ltd. korxonasida inspeksion tekshiruv o‘tkazish belgilanganidan xabar topgan korxonaning norasmiy rahbari boshqa bir hindistonlik J.S. Quramax Medical MCHJ direktori R.S.P. va jamiyatning savdo direktori B.Q.lar bilan til biriktirib, korxonaning ishlab chiqarish sharoitlari belgilangan talablarga javob bermasligi, tekshiruv o‘tkazilgan taqdirda mazkur kamchiliklar yuzaga chiqib, korxonaning boshqa dori vositalarining ham O‘zbekistonda ro‘yxatdan o‘tkazish taqiqlanishi hamda ularning importi to‘xtatilishi mumkinligini taxmin qilgan. Va davlat markazi masʼullari orasidan inspeksion tekshiruvni bekor qilish imkoni bo‘lgan xodimni topish harakatiga tushgan. Bu ishda ularga J.E. ismli masʼul yordam berib, evaziga 45 ming dollar so‘ragani, ammo 33 ming dollar olgani aniq bo‘lgandi. Hindistonlik ayblanuvchi R.S.P. tekshiruvni to‘xtatish uchun 33 ming dollar berilganini tan olib, pul masʼullarga berilganini, ammo nima maqsadda berilganidan bexabarligini qo‘shimcha qildi.
Izoh (0)