Ўзбекистонда бир неча ой давомида жамоатчилик эътиборини ўзига қаратган “Док-1 Макс” иши якунланаётгани, судлов ҳайъати маслаҳатга киргани хабар берилганди. Суднинг бугун, 19 февраль куни давом этган навбатдаги мажлисида сўз олган судланувчилардан бири 3,5 ой давомида тергов ҳибсхонасида ноҳақ сақлангани ва унга нисбатан асоссиз айбловлар қўйилганини айтиб, бунинг учун моддий ва маънавий зарар ундирмоқчилигини маълум қилди. Бу ҳақда судда қатнашган “Дарё” журналисти хабар берди.
Судда сўз олган судланувчи Н.Ш. 2023 йил сироп иши билан боғлиқ мазкур жиноят иши доирасида унга нисбатан дастлаб қамоққа олиш тарзидаги эҳтиёт чораси қўлланилганини, шунингдек ноҳақ айбловлар қўйилганини айтиб, бу ўз исботини топмагани учун компенсация сўради.
Менга нисбатан қамоққа олиш тарзидаги эҳтиёт чораси нотўғри қўлланилиб, асоссиз айб эълон қилингани учун суддан моддий ва маънавий зарар компенсация тарзида тўлаб берилишини сўрайман, — деди у.
Эслатиб ўтамиз, “Док-1 Макс” иши бўйича дастлаб 21 нафар шахсга жиноят иши қўзғатилгани, уларнинг 7 нафарига нисбатан қамоққа олиш тарзидаги эҳтиёт чораси қўлланилгани очиқланганди. Суд тергови давомида яна 2 нафар судланувчига нисбатан қамоққа олиш тарзидаги эҳтиёт чораси қўлланилди. Суд тергови пайтида аниқланишича, тергов пайтида 7 нафар судланувчидан ташқари бир нечта судланувчига қамоққа олиш тарзидаги эҳтиёт чораси қўлланилган.
Изоҳ (0)