Ўзбекистонда энг камида 68 нафар боланинг ўлимига, 16 нафар боланинг ногирон бўлиб қолишига сабабчи бўлгани айтилаётган “Док-1 Макс” сиропи бўйича бошланган судда адвокатларнинг музокара сўзи тингланмоқда. Бу ҳақда судда қатнашган “Дарё” журналисти хабар берди.
Суднинг 14 февраль куни давом этган навбатдаги мажлисида сўз олган адвокатлардан бири Даврон Аҳмадов ҳимояси остидаги судланувчиларнинг айби йўқлигини, уларга нисбатан оқлов ҳукми чиқарилиши кераклигини маълум қилди.
Суд тергови даврида, шунингдек, ўзим томонимдан амалга оширилган изланишлар ва ҳимоям остидаги судланувчиларни ҳимоя қилиш пайтидаги тадқиқотларим давомида шунга ишонч ҳосил қилдимки, болалар ўлими, уларнинг ногирон бўлиб қолишига “Док-1 Макс” ва “Амбронол” сиропларининг умуман алоқаси йўқ. Тергов томонидан ҳам бу нарса исботлаб берилмаган. Ҳар қандай исботланмаган нарса судланувчи фойдасига ҳал бўлади, — дейди Quramax Medical МЧЖ директори, судланувчи С.Р.П.нинг адвокати Даврон Аҳмадов.
Адвокатнинг айтишича, бола “Док-1 Макс” ва “Амбронол” сиропларидан заҳарланиб вафот этиши учун, бир пайтнинг ўзида 100-200 мл миқдордаги тоза этиленгликолни истеъмол қилиши керак бўлади.
Илмий адабиётларда ёш болалар бир пайтнинг ўзида 100 ёки 200 мл миқдордаги тоза этиленгликолни истеъмол қилса, катта одамлар эса 250-500 мл миқдордаги этиленгликолни ичса, заҳарланиши мумкин дейилган. Бизнинг ҳолатимизда эса болаларнинг бирортаси 100 ёки 200 мл этиленгликолни бирданига ичмаган. “Док-1 Макс” сиропи таркибида 14 га яқин моддалар бор. Шунинг ичида ёрдамчи модда сифатида этиленгликол ҳам бор. Фармкомитетнинг текширишича, 10 мл сироп таркибида 1,9 мг этилингликол топилган. Бу дегани агар 2,5 мл сироп ичса, ичида 0,05 мг этиленгликол бўлади. Бу модда организм таркибига тушиб, ичак, буйрак ва жигарни ишдан чиқаришга кучи етмайди. Боланинг оғзида қолиб кетади. Этиленгликол заҳарли модда эмас, зарарли модда. Илгари бу моддадан тиббиётда фойдаланилган. Кейинги йилларда бу моддани ишлатмаслик тавсия қилинган, — дейди адвокат Даврон Аҳмадов.
Адвокатнинг билдиришича, 68 нафар бола коронавируснинг янги штамидан вафот этган.
68 нафар бола сиропдан эмас, коронавируснинг янги тури натижасида вафот этган. 2022 йилда COVID’нинг янги тури пайдо бўлиб, у ўткир буйрак етишмовчилигини келтириб чиқариши аниқланган. Бу ҳақда Соғлиқни сақлаш вазирлигининг протоколи ҳам чиққан бўлиб, унда COVID’нинг янги турини даволаш кўрсатилган. Протоколда COVID’нинг янги тури ўткир буйрак етишмовчилиги билан кузатилиши ёзиб қўйилган. Ўлган болаларнинг асосий қисми 2-3 ёшли болалар бўлган. Айнан шу ёшдаги болаларда COVID’га тест олинмайди. Болаларда иситма чиққан, йўталган, қайт қилган. Ота-оналар йўталнинг олдини олиш учун “Док-1 Макс” беряпти. Бу эса боланинг яна аҳволини оғирлаштирган. Шу сабаб болалар вафот этган. Болаларда буйрак етишмовчилиги нафақат Ўзбекистонда, Қозоғистонда ҳам кузатилган, — дейди адвокат.
Адвокатнинг аниқлаштиришича, Қорақалпоғистон республикаси, Сурхондарё вилояти ва Тошкент шаҳридаги суд экспертлари хулосасида ҳам ўткир буйрак етишмовчилиги билан оғриган болалар COVID’га чалингани ҳақида ёзилган.
Изоҳ (0)