Ўзбекистонда энг камида 68 нафар боланинг ўлими ва 16 нафар боланинг ногирон бўлиб қолишига сабабчи бўлгани айтилаётган “Док-1 Макс” сиропи бўйича бошланган суд якунланаётгани, судлов ҳайъати маслаҳатга киргани ҳақида хабар берилганди. Суднинг 19 февраль куни бўлиб ўтган навбатдаги мажлисида судланувчиларга сўнгги сўз берилди. Сироп ишида айбдор кўрилаётган Фармагентликнинг собиқ раҳбари Сардор Кариев салкам 7 ойдан бери давом этаётган суд мажлисларини тўла-тўкис ва холис ёритгани учун ОАВга миннатдорлик изҳор қилди. Бу ҳақда судда қатнашган “Дарё” журналисти хабар берди.
Таъкидланишича, 23 нафар судланувчидан фақатгина Сардор Кариев “Док-1 Макс” ишининг ОАВ орқали оммалаштирилишига эътибор қаратиб, журналистларга ташаккур изҳор қилган.
Ҳурматли суд ҳайъати, ҳурматли иштирокчилар ва оммавий ахборот воситалари вакиллари, ҳозир судланувчилар томонидан адолатли қарор чиқарилиши сўралмоқда. Ҳозирги кунда бизнинг жамиятда адолат тушунчаси жудаям тарқоқ бўлиб кетди. Ҳаммада адолат тушунчаси бор. Фурсатдан фойдаланиб, жабрланувчиларга ўзимнинг ҳамдардлигимни билдирмоқчиман. Жудаям катта фожиа бўлди. Бунинг қайтарилишидан Худо асрасин. Фарзанд доғини кўрган ота-оналарга сабр тилайман. Жабрланган болаларга соғлиғини тезроқ тиклашларини тилаб қоламан. Хабарингиз бор, суд ярим йилдан бери давом этмоқда. Судда тарафларнинг, жамиятнинг адолат тушунчаси ҳар хил бўлиб кетди. Судда жабрланувчиларни ҳам кўрдик, эшитдик. Уларнинг (жабрланувчилар учун демоқчи — таҳририят изоҳи) оғир аҳволини тушунамиз, албатта.
Лекин, афсуски, улар учун адолат тушунчаси бизнинг болаларимизга ўша сиропни ичириш. Жабрланувчилар орасида бизнинг болаларимизга, ўзимизга ўлим тилаганлар ҳам бўлди. Ёки умрбод қамоқ жазосини сўраганлар ҳам бўлди. Баъзилари иш қонуний кўрилиши тарафдори бўлди. Шу судда қатнашган жабрланувчи акамиз бор воқеани билгач, тўғри тушуниб, буларнинг айби йўқ, деди. Минг афсуски, жабрланувчилар учун бўлиб ўтаётган суд мажлисларида жабрланувчиларнинг бирортаси ҳам суд бошидан охиригача иштирок этмади. Бунинг сабаблари бордир, албатта. Жабрланувчилар судда кўтарилган масалалардан тўла-тўкис хабардор бўлмагани, бизга қўйилаётган айбловлар ва бу айбловларга нисбатан бизнинг келтирган далилларимизни билишмади, эшитишмади. Шу сабаб бу айбловлар тўғрими ёки нотўғри — бехабар қолишди. Албатта, суд жараёни оммавий ахборот воситалари томонидан ёритиб борилди. Фурсатдан фойдаланиб, оммавий ахборот воситаларига ўзимнинг чуқур миннатдорчилигимни билдираман. Сизларга суд жараёнини тўла-тўкис, ойдин ёритиб берганинглар учун раҳмат айтаман, — дейди судланувчи сўзининг сўнгида.
Фармацевтика тармоқларини ривожлантириш агентлигининг собиқ раҳбари Сардор Кариев “Док-1 Макс” судининг кўлами кенглигини, салкам етти ой давомида ҳафтасига уч кун, саккиз соатдан давом этганини эслатиб, “Бу воқеаларни ОАВ орқали тўлиқ оммага етказиб бериш имконияти бўлмади, одамлар суд жараёнини тўлиқ кўролмагани учун ҳаммада тушунча ҳар хил бўлиб қолди”, деди.
Шу нуқтайи назардан айтяпманки, ҳаммада адолат тушунчаси ҳар хил бўлмоқда. Жамият ҳам бизга келганда иккига ажралди. Кимдир буларга жазо берилсин деса, бошқа биров йўқ, рўйхатдан ўтказиш тўғри бажарилган экан, инспексион текширув масаласи бошқа дори бўлса, ким пулини олган бўлса, ўзи жавоб берсин, буларда айб йўқ, демоқда. Кўриб турибмизки, жамиятда ҳам адолат тушунчаси ҳар хил бўлмоқда. Мен учун эса, адолат — менга туҳмат қилиб, босим қилиб, айдор қилишга уринган инсонларнинг жавобгарликка тортилиши. Уларга жиноят иши очилиб, менга оқлов эълон қилиниши мен учун адолат, — деди Сардор Кариев.
Изоҳ (0)