Санкт-Петербургдаги 622-сонли гимназия яқинида 20 февраль куни ёлланма қотил Ўзбекистон фуқаросига ўқ узган эди. Жабрланувчи олган жароҳатлари оқибатида икки кун ўтиб касалхонада вафот этди. Бу ҳақда “78.ру” хабар берди.
Марҳум Рустам Алдаев петербурглик адвокат Виктор Патрушевнинг ҳайдовчиси бўлиб, Елизаветинская касалхонасида вафот этган. Эндиликда қотилликка суиқасд бўйича жиноий иш қайта тоифаланиб, тергов Россия Жиноят кодексининг 105-моддаси 2-қисми 3-банди “Ёлланма қотиллик” бўйича давом эттирилади.
20 февраль куни қотил ўзбекистонлик ҳайдовчини “Макаров” тўппончасидан узоқ масофадан отиб ташлаганди. Касалхонага ётқизилганидан сўнг шифокорлар жабрланувчини реанимацияга жўнатиб, бир қатор шошилинч операцияларни амалга оширган, бироқ иккинчи куни эркак ўзига келмай касалхонада вафот этган.
Қотиллик жойидан “Макаров” тўппончасининг 9 мм калибрли 1 дона гилзаси топилган. Версиялардан бирига кўра, у ҳайдовчини адвокатнинг ўзи билан чалкаштириб юборган. Ўзбекистон фуқаросини буюртма асосида ўлдирган уч киши қўлга олинган, уларнинг икки нафари ака-ука экани айтилган.
Суиқасдга 20 миллион рублга яқин мулкий можаро сабаб бўлган: қотилликка буюртма берган шахс, тадбиркор Гинтерас Рагаускас уйга эгалик қилиш бўйича адвокат билан узоқ вақт келишмовчиликка борган.
Изоҳ (0)