“Тошкентнинг шўх қизи” сифатида танилган Дилфуза Исмоилова бу йил 56 ёшни қаршилади. Унинг ҳаракатлари қўшиқда айтилганидек ҳамон шўх ва қувноқ. Ҳаёт қийинчиликларида тобланган ижодкор кўнглидагиларни атрофдагилардан яширмайди. Аксинча, бахтли турмуши ортидаги қийинчиликлар ҳақида одамлар билишини истайди.
“Отам санъаткор бўлишимга қаршилик қилган”
Дилфуза Исмоилова санъатга алоқаси бўлмаган оилада дунёга келган. Шу боис отаси унинг санъаткор бўлишига жиддий қаршилик қилган.
— Оилада етти қиз ва бир ўғил бўлганмиз. Ота ҳовлимиз шаҳар марказидаги Қоратош мавзесида бўлса-да, уйимизда чорва молларини ҳам боқардик. Эрталаб мактабга кетишдан аввал бетондаги сутларни сотиб келиш каминанинг вазифаси бўлган. Шу боисданми мен қизлардек нозик табиатли, нимжон бўлмаганман. Лой қориб, ғишт қуйишни ҳам уддалаганим учун отам раҳматли “Дипу ўғлим” деб эркаларди. Мен шаҳардаги 116-мактабда ўқиганман. “Баҳор қайтмайди” сериалида Анвар ролини ижро этган Рустам Абзалов мактабимизда директор эди. У инсон ҳам санъатни севгани учун драма тўгарагини ташкил қилганди. Кўпчилик қизлар қатори тўгаракка қатнашганман ва санъатга меҳр қўйганман. Онам “Фарзандларимдан бирортаси машҳур бўлса, пули кўп бўлса”, деб орзу қиларди, аммо отам раҳматли бу соҳани танлашимга жиддий қаршилик қилган. Кейинчалик ўзи дуо билан фотиҳа берган, — дейди Дилфуза Исмоилова.
“Аэропортдан ортимга қайтганман”
Дилфуза Исмоилова 1985 йили санъат институтининг “Кино ва драма” факультетига ўқишга кирган. Ўша йили машҳур режиссёр Шуҳрат Аббосов энг истеъдодли актёрларни жамлаётгани ҳақидаги гап-сўзлар тарқалади. Режиссёр истеъдодли абитуриентлар орасидан Дилфуза Исмоиловани танлаб олади.
— Шуҳрат Аббосовнинг курсида ўқиш осон эмасди. Талабчан, изланувчан ва ниҳоятда қаттиққўл устоз эди. Кўпчилик мени комик актриса сифатида танийди, аммо мен талабалик чоғларимда драматик ролларни ҳам ижро этганман. Ҳар куни тайёргарлик бўларди, роль кўнгилдагидек чиқмаса, устозимиз кетишимизга йўл қўймасди. Шундай кунларнинг бирида россиялик киноижодкорлар ўзбек қизи роли учун актриса излаётган экан. Мен ҳақимдаги маълумотлар уларга қандай бориб қолганини билмайман. 1987 йили улар Москвага таклиф қилди, самолёт чипталарини ҳам юборишди. Аммо кетишимдан курсдошларим хафа бўлган эди. Чунки мен кетсам рэпертуардаги спектаклларни қайта саҳналаштириш керак бўларди. Аэропортга борганман-у, бир соатча ўйлаб ортимга қайтганман. Менимча, менда содиқлик кучли, агар шундай бўлмаганида Тошкентда қолишга қарор қилмаган бўлардим, — дейди Дилфуза Исмоилова.
“Келин пул олиб келса, ҳаммага ёқади”
Актриса отасининг ўлимидан сўнг ҳамма нарсадан, хусусан санъатдан ҳам кўнгли қолгани ҳақида сўзлаб берди.
— 1989 йили оила қурганман. 1990 йили эса тўнғич фарзандим дунёга келган. Афсуски, шундай кунларнинг бирида отам вафот этган. Ўшанда оиламизга жуда қийин бўлганди, чунки сингилларим ҳали ёш, оиламизнинг боқувчиси эса оламдан ўтди. Ҳамма нарсадан ҳафсалам пир бўлиб юрганида қайнонам театрга ишга киришим кераклигини айтган. Аввалига ишлашни хоҳламаганман, чунки отамнинг ўлими жуда оғир таъсир қилганди. Охири рози бўлиб, Аброр Ҳидоятов номидаги театрга ишга қабул қилинганман. Икки йилга яқин ишладим, аммо оладиган ойлигимдан ҳеч кўнглим тўлмасди. Шунда машина олди-сотдисига қизиқиб қолдим. Сармоя киритиб, машинани олиб, у ер бу ерини тузатиб қайта сотардим. Жуда яхши фойда қоларди, келин пул олиб келса ҳаммага ёқади. Хурсанд бўлиб, ишимни қўллаб-қувватлашарди, — дейди Дилфуза Исмоилова.
“Сценарийни 50 йилда ҳам ёдлолмайман”
Дилфуза Исмоилованинг танилишида “Гап йўқ” жамоасининг ҳиссаси катта. Унинг такрорланмас роллари ҳам айнан ана шу жамоа билан биргаликда яратилган.
— Режиссёр Тўхтамурод Маҳкамов билан танишишимга Олимжон ака сабабчи бўлган. Ҳаммамиз бир мактабда ўқиган, олдинма кейин санъат институтини тамомлаган талабалар эдик. Тўхтамурод Маҳкамов роль беришда инсоннинг феъл-атворини ҳам ҳисобга оладиган, самимиятни яхши кўрадиган инсон эди. Табиатан битта камчилигим бор, буни ҳеч тўғирлай олмадим. Эрталаб уйғонишим жуда қийин, уйғонган тақдиримда ҳам ролни ижро этолмайман. Тўхтамурод ака шуни билиб атайин мен билан боғлиқ саҳналарни тушдан кейин оларди. Сценарийни олдиндан кўрмасдим, шу боис Тўхтамурод ака ўша ерда шошиб ўқиб берарди. Битта сценарийни 50 йилда ҳам ёдлай олмайман, аммо гапириб беришса тезда ёдимда қолади. Аслида сценарийда сигир судраб кетиши-ю, поезд тепасида югуриш билан боғлиқ саҳналар бўлмаган. Ҳаммаси суратга олиш майдончасида тасодифан яратилган. Тўхтамурод Маҳкамов операторга “Индамай олавер, Дилфузанинг ўзи ролни қойиллатади”, дерди. Ҳақиқатан ҳам беш дақиқадан кейин қандай хатти-ҳаракатни қилишимни билмасдим. Ҳаммаси “мотор” дейилганида яратиларди, — дейди Дилфуза Исмоилова.
“Овоз эшакда ҳам бор”
Дилфуза Исмоилованинг қўшиқ куйлаши томошабинлар учун кутилмаган янгилик бўлган. Уни кўпчилик хонанда сифатида тан олмаган ва танқид тошларини отган. Шундай бўлса-да, у “Тошкентнинг шўх қизи” қўшиғи билан ўз мухлисларини топган.
Мазкур қўшиқ 2000 йилда Дилфуза Исмоилова ғояси, Тоҳир Муҳаммад сўзи асосида яратилган. Мазкур қўшиқдан сўнг хонандага омад кулиб, тўйларининг кети узилмай қолди.
— Йигирма йилдан буён “Тошкентнинг шўх қизи” қўшиғини кунига камида 10-15 маротаба ижро этаман. Кунига 4-5 та “бирров”им бўлса, ҳар бир тўйда камида икки-уч марта ижро этишимни сўрашади. Энг қувонарлиси, қўшиқни аввал ёшлар сўрарди, ҳозир 80 ёшли онахонлар ҳам шу қўшиққа рақсга тушяпти. Овози йўқ дейдиганларга жавобим — у эшакда ҳам бўлади. Мен ойлаб битта қўшиқ устида ишламайман, ярим соатда шеърни қўлимга олиб битта айтиб, студиядан чиқиб кетаман. Қўшиқ кўнгилдан чиқиши керак, шундагина самимий бўлади. Овози йўқ дейдиганларга айтар гапим 24 йилдан буён қўшиқ айтиб халқ хизматида юрибман. Битта чиқиб, йўқ бўлиб қолмадим. Санъатда овоз роль ўйнамайди, — дейди Дилфуза Исмоилова.
“Аҳмадбойга машина бериб куйдим”
Ижтимоий тармоқларда хонанда Дилфуза Исмоилова тўй маросими вақтида Аҳмадбойни дуо қилаётгани тасвирланган видеолар пайдо бўлади. Қўшиқчи “Бахтимизга бой отамиз соғ бўлсинлар, умрлари узоқ бўлсин! Аллоҳ сизни ўз паноҳида асрасин. Бой отамизни ёмон кўзлардан, ёмон одамлардан худо асрасин!”, — дейди.
— Аҳмадбойга пул бермаганман. Машина бергандим. Машинага куйдим. У ҳам бир инсон. Беайб парвардигор. Дўстга ҳам, душманга ҳам айтадиганим — омадини берсин, — дейди Дилфуза Исмоилова.
“Лўлилар қўшиқчиларга кўп пул беради”
Дилфуза Исмоилова интервьюларининг бирида лўлиларни яхши кўриши, улар тўйда айтилган нархдан ўн баравар кўп бериши ҳақида гапирганди.
— Лўлиларнинг буюртмаси билан тўйларига бораман. Мен уларни роса ҳурмат қиламан, уларни яхши кўраман, меҳмондўст бўлишади. Буюртма қилишади, улар мард. Қанча беришини айтмайман, лекин ўзимизнинг инсонлардан ўн баравар кўп тўлашади. Жуда ҳам мард бўлишади, улар мени яхши кўришади, мен ҳам уларни яхши кўраман”, — дейди хонанда.
“Турмушга чиқишга уялдим”
Дилфуза Исмоиловага арабистонлик шайхдан совчи келгани, у бир нечта жомадонда тилла ва кийимларни совға қилиб юборгани, хонанда эса уни инсонларга тарқатиб юборгани ҳақида ҳам айтганди.
— Ҳақиқатан совчи келган, уйланмаган, ҳозир Арабистонда. Умра сафарига боришимдан олдин уларнинг элчихонасида суҳбатлашиб ўтирганмиз, шунда ёқтириб қолган. Ҳақиқатан совчилар қўйиб, оламан деб жомадон-жомадон совға жўнатган. Ҳаммасини тарқатиб юборганман, зўр нарсалар эди, керак эмас, тегмайман деганман. Уларнинг тилини, инглиз тилини билмайман, ёнидаги таржимонлари билан гаплашганман, рус тилида гапирса, тушуниб жавоб қайтарганман. Совғаларини тарқатиб юбориб савоб олганман, лекин битта нарсасини ҳам тақмаганман ҳам, киймаганман ҳам. Шунақа одатим бор, энди уят бўлса керак, учта болали, еттита неварали бўлиб турмуш ўртоқ чиқибди деб тегиб кетмайман-ку. Бу масалада ўзимни ҳурмат қиламан, — дейди Дилфуза Исмоилова.
“Қайнонам ҳам қўшиқчи бўлган”
Хонанда шахсий ҳаётда омади кулмагани турмуш ўртоғининг нотўғри қадами сабаб уч бола билан ажрашгани ҳақида сўзлаб берган.
— Турмуш ўртоғим билан ажрашиб кетганимизга 18 йилдан кўпроқ бўлди. Турмуш ўртоғим курсдошим эди. Жуда ҳам тарбияли, яхши инсон бўлган. Санъаткорлар оиласига келин бўлиб тушганман. Қайнонамга ҳам гап бўлиши мумкинмас. Қайнонам Нодира Аҳмедова, қўшиқчи бўлган.
Турмуш ўртоғим билан ажрашишимга уларнинг нотўғри қадами сабаб бўлган. Қўпол бўлса ҳам айтаман, мен ҳеч қачон ҳаром нарсани ўзимга яқинлаштирмайман. Менинг бир одатим борки, яқин инсоним алдаса, ҳеч қачон кечирмайман. Айбини кечиришим мумкин, лекин у одам мен учун йўқ,—дейди Дилфуза Исмоилова.
Дилфуза Исмоилова нима сабабдан фильмларда роль ижро этмаяпти?
— Зўр актрисалигимни биламан, мендек актриса йўқлигини ҳам биламан. Мен текинга роль ўйнайдиган актриса эмасман. Катта пул сўрайман, уни беришмайди, аксинча, улар сиздан пул сўрашади. Шунинг учун ўзимни хор қилгим келмайди, чунки шу йўналишда ўқиб ишлаганман. Менинг ҳам фарзандларим, тирикчилигим бор. Кўп таклифлар бўлади, яқинда ҳам бир таклиф тушган эди, нархини айтгандим, бўлди, жавобини эртага айтаман, деб йўқолиб қолди. Ҳеч қачон текинга роль ўйнамайман”, — дейди Дилфуза Исмоилова.
“Сув заводим бор”
Дилфуза Исмоилова ўғилларининг ҳам санъаткор бўлишини истаганди. Аммо уларнинг қўшиқлари у қадар оммалашмади. Ҳозир ўғиллари тадбиркорлик билан шуғулланади.
— Катта ўғлим ҳовли қуриб сотади. Кичкина ўғлим Сарварнинг сув заводи бор. Қўли қўлига тегмай ишлайди, сув бешта филтрдан ўтади. Сув ҳам ернинг тагидан олинади, ҳалол қилиб ишлаб чиқарилади. Менинг ҳам беш хил сув заводим бор, — дейди актриса.
Изоҳ (0)