Россия яқинда қамоқда вафот этган мухолифатчи Алексей Навалнийни Федерал хавфсизлик хизмати (“ФСБ”) махфий департаменти ходими Вадим Красиковга алмашишни режалаштирган. Бу ҳақда манбаларга таяниб, Bild хабар берди.
Маълум қилинишича, асирларни алмашиш бўйича музокаралар Россия, АҚШ ва Германия ўртасида бўлиб ўтган. Россия президенти Владимир Путин ҳозир Германия қамоқхонасида сақланаётган агент Вадим Красиковни мамлакатга қайтармоқчи бўлгани таъкидланади.
Путин бу ҳақда америкалик журналист Такер Карлсонга берган интервьюсида ҳам ишора қилгани айтилмоқда. Вадим Красиков 2019 йил 23 август куни Берлинда собиқ чечен қўмондони Зелимхон Хангошвилини ўлдирганликда айбланиб, умрбод қамоқ жазосига ҳукм қилинган.
The Wall Street Journal 2023 йил сентябрь ойида Россия ҳукумати журналист Эван Гершкович ва Россиядаги бошқа америкалик маҳбусларни Вадим Красиковга алмаштириш имкониятларини қидираётгани ҳақида хабар берди. Ўшанда россиялик мухолифатчи Алексей Навалнийни ҳам алмашиш имконияти борлиги айтилган эди.
Алексей Навалний ўлими
Россиялик сиёсатчи, Путиннинг ашаддий танқидчиси Алексей Навалний 16 февраль куни колонияда вафот этди. Россия қамоқхона хизматига кўра, у “сайрдан кейин ўзини ёмон ҳис қилган ва ҳушини йўқотган”. Ўлимга дастлаб тромб ёрилгани сабаб бўлгани айтилган.
“Оммавий ахборот воситаларида ёзилаётган ва Жазони ижро этиш Федерал хизмати томонидан эълон қилинган хабарда Алексей Навалний тромб ёрилишидан вафот этгани айтилмоқда. Аммо буни ҳозирча тасдиқлаб бўлмайди, чунки бу касалликни аниқлаш учун аввал мурдани ёриб кўриш керак”, — деган Навалнийни даволаган шифокор Полупанов.
Ўз навбатида, Тергов қўмитаси терговчилар марҳумнинг жасадини текширмоқчи.
“Алексей Навалнийнинг жасади зудлик билан оиласига берилишини талаб қиламиз”, — дейди сиёсатчининг матбуот котиби.
Изоҳ (0)