Журналистика ва оммавий коммуникациялар университети ректори Шерзодхон Қудратхўжа AlterEgo лойиҳасига берган интервьюсида Ўзбекистон мустақилликка эришганининг илк йилларида ахборот эркинлиги қандай бўлгани тўғрисидаги саволга жавоб қайтарди.
Шерзодхон Қудратхўжа 1994 йилдан бошлаб Ўзбекистон Миллий телерадиокомпаниясида ишлашни бошлаган. 1998 йилда эса УзTV4 телеканали директори бўлган. Унинг сўзларига кўра, мустақилликнинг илк йилларида “Ахборот” информацион дастури анча қизиқ бўлган. Бироқ 1997-1998 йиллардан бошлаб ишлаш бир оз қийинлашган.
“1997 йилда заправкалардан бензинни тўлиқ қуймаётганликлари ҳақида лавҳа тайёрлагандим, у вақтлар бу барчанинг муаммоси эди. Шу материалим эфирга чиқмади. Унинг эфирга чиқмаслиги эвазига катта пуллар — 50 минг долларгача пул таклиф қилишди. Улар ўзига хос мафия эди.
Бундан мақсад муаммо давлат раҳбарига етиб бормаслигида эди… Охир-оқибат бу материал 8 мартда, якшанба куни, давлат раҳбари шаҳардан ташқарига чиқиб кетганида эфирга узатилди. Ўша вақтда менга қийин бўлганди”, — дейди Қудратхўжа.
Унинг айтишича, телевидениега тегишли транспорт воситасига 70 литр бензин учун пул тўланганида, 16-17 литр кам қуйилган.
Шерзодхон Қудратхўжанинг сўзларига кўра, бензин муаммоси бўйича эфирга кетган лавҳани Вазирлар Маҳкамаси раҳбарининг биринчи ўринбосари лавозимида ишлаган Исмоил Жўрабеков кўрган ва муаммога қарши қаттиқ чора кўрган.
Изоҳ (0)