«Ҳар қандай ҳолатда ҳам журналистга, умуман медиа соҳасидаги ҳар бир одамга куч ишлатиш нотўғри» — Шерзодхон Қудратхўжа

Ўзбекистон Миллий медиа ассоциацияси раиси Шерзодхон Қудратхўжа «Севимли» телеканали ходимларининг ички ишлар ходимлари томонидан калтакланиши ва Андижонда ИИБ ходими Human нашри журналистининг телефонини тортиб олгани бўйича тарқалган хабарларга муносабат билдирди.

Мен ўзим ҳам шу ерда эдим, кузатувларим ҳам бор. Пандемиядан кейинги даврми ёки одамларимиз анчадан бери бу даражадаги футбол кўрмагани учунми, ўша куни одамларда эҳтирос кучли бўлди. Бу эса баъзан агрессия ҳолатларини келтириб чиқаради. Тушунамиз, футбол миллионлар ўйини. Лекин биз Осиё футбол федерацияси, судьялари қарорларини ҳурмат қилишимиз керак. Биз ўзимизнинг майдонда, жамоамиз учун жон куйдирамиз. Шу билан бирга, ўрнатилган умумий футбол қоидалари бор. Ўзбекистон ҳудудида бунга амал қилишимиз лозим. Бу жиҳатдан биз ўзимизга хос бўлган вазминликни, донишмандликни кўрсатишимиз керак. Афсуски, ўша куни мухлисларнинг Ироқ футболчиларига ва баъзида бизнинг журналистларга ҳам сув идишлари ва оғир предметли нарсаларни отганларини ҳам оқлаб бўлмайди.

Биз футбол томошабини бўлиш маданиятини ўрганишимиз керак. Мана кўряпмизки, бунинг оқибатлари яхши бўлмаяпти...

Энди «Севимли» телеканали бўйича... Бу ҳақида биз бир нечта манбалардан суриштиряпмиз. Чунки манбалар ҳар хил маълумот беришмоқда. Ҳар қандай ҳолатда ҳам журналистга, тасвирчига нисбатан, умуман медиа соҳасидаги ҳар бир одамга нисбатан ким тарафдан ва қандай мақсадда бўлса ҳам, куч ишлатиш, тазйиқ ўтказиш ёки таҳдид қилиш нотўғри.

ЎзMMA номидан «кучишлатар тизим»ларни, ўша куни футбол хавфсизлигига жавоб берган тизимларни медиа олами ва унинг вакилларига бундай қилмасликка чақирамиз!».

Албатта, ОАВ ходимларига касбий тазйиқ кўрсатиш, уларга нисбатан куч ишлатишни кескин қоралайди ҳамда бу қонунчиликка зид фаолият деб ҳисоблайди.

Шерзодхон Қудратхўжа, Ўзбекистон Миллий медиа ассоциацияси раиси

ИИВ матбуот котиби Шохруҳ Ғиёсовнинг маълум қилишича, телеканал журналистлари стандионга киришда жанжал уюштирган фуқаролар орасида бўлган ва оператор ўша ерда жароҳатланган.

Андижон шаҳридаги «Янги бозор» савдо мажмуасида эса одамларга навбат билан арзонлаштирилган шакар сотиш жараёнини тасвирга олишга уринган журналистнинг телефони тортиб олинган. «Бир қанча уринишлардан сўнг ҳам смартфон қайтариб берилмаяпти. Ягона шарти – куч ишлатиш йўли билан олинган ва ИИБ ходимининг куч ишлатгани ҳамда телефонни тортиб олгани суратга олинган видеони ўчириб юбориш экан», — дейилади хабарда.

Шохруҳ Ғиёсовга кўра, мухбир одамларнинг навбатини ва ўзаро гап талашаётганини тасвирга олиш вақтида, фуқаролар томонидан уларнинг юзларини тасвирга олишига эътироз билдирилган. Шундан сўнг, ИИБ ходими журналистдан уларнинг ҳуқуқларини поймол қилмасдан тасвирни ўчириб ташлаш талаб қилинган.